पुणे, ता. ८ ः पुणे जिल्ह्यातील सर्व प्राथमिक आरोग्य केंद्रांच्यावतीने येत्या गुरुवारी (ता. ७) आरोग्य तपासणी आणि महारक्तदान शिबिरांचे आयोजन करण्यात आले आहे. या महारक्तदान शिबिरांसाठी स्थानिक ग्रामपंचायत, लोकप्रतिनिधी, सामाजिक संस्था आदींना सहभागी करून घेण्यात यावे, अशा सूचना जिल्हा परिषदेचे मुख्य कार्यकारी अधिकारी आयुष प्रसाद यांनी सर्व प्राथमिक आरोग्य केंद्रांच्या वैद्यकीय अधिकाऱ्यांना दिल्या आहेत.
पुणे जिल्ह्यात ८५ प्राथमिक आरोग्य केंद्र आणि ५३९ आरोग्य उपकेंद्र कार्यरत आहेत. मात्र ही महारक्तदान शिबिरे केवळ प्राथमिक आरोग्य केंद्रांच्यावतीने आयोजित करण्यात येणार आहेत. यंदा पुणे शहरात कसबा विधानसभेच्या पोटनिवडणुकीची आचारसंहिता लागू आहे. त्यामुळे जिल्हास्तरीय कार्यक्रम ससून रुग्णालय किंवा औंध येथील जिल्हा रुग्णालयात आयोजित करता येणार नाही. त्यामुळे हा कार्यक्रम आता मंचर येथील ग्रामीण रुग्णालयात आयोजित करण्यात आला असल्याचे आयुष प्रसाद यांनी सांगितले.