पुणे, ता. १० : ‘‘आरोग्य आणि आनंद ही आपल्या जीवनाची दुहेरी ध्येये मानतो. आपल्यापैकी अनेकांचा असा विश्वास आहे की आपण निरोगी असल्यास आपण आनंदी असू. परंतु, आपल्याला हे लक्षात येत नाही की, आपण आनंदी असल्यास आपण आपोआप निरोगी होऊ शकतो. आनंदामुळे आरोग्य चांगले राहते आणि खरा आनंद तेव्हाच मिळतो जेव्हा आपण आपले दुःख विसरून इतरांना मदत करतो आणि मानवतेचे सेवक बनतो,’’ असे मत साधू वासवानी मिशनच्या अध्यक्षा कृष्णा कुमारी थडानी यांनी व्यक्त केले.
‘फ्रीडम फ्रॉम डायबेटिस’ या संस्थेला आज १० वर्षे पूर्ण झाल्याच्या निमित्ताने आयोजित कार्यक्रमात थडानी बोलत होत्या.
त्या म्हणाल्या, ‘‘आपल्या मनाला ऊर्जा देणारी सजगता, कृतज्ञतेची वृत्ती जी सर्वात मोठी प्रतिकारशक्ती वाढवणारी आहे, प्राणाची शक्ती समजून घेणे आणि मानवतेला मदत करणे आपल्याला आनंदाकडे नेऊ शकते. आयुष्य म्हणजे आनंदाचा प्रवास आहे पण, आपण त्याला शर्यतीत बदलतो.’’ ‘फ्रीडम फ्रॉम डायबेटिस’ स्थापना डॉ. प्रमोद त्रिपाठी यांनी केली असून या संस्थेच्या माध्यमातून मधुमेहाबाबत जागरूकता आणि चिकित्सा उपक्रम राबविले जातात.