पुणे, ता. ५ : ‘‘माणसाच्या आयुष्यात पालक महत्त्वाचे असतात, त्याचप्रमाणे शाळा ही अत्यंत महत्त्वाची असते. शाळेतील शिक्षण आणि संस्कारामुळे केवळ विद्यार्थीच नव्हे तर माणसाची जडणघडण होते. कोणताही शिक्षक हा केवळ विद्यार्थी घडवत नाहीत तर तो एक प्रकारे माणूस आणि देश घडवत असतो,’’ असे मत योगगुरु डॉ. संप्रसाद विनोद यांनी व्यक्त केले.

महाराष्ट्र एज्युकेशन सोसायटीचे मुलांचे विद्यालय आणि उच्च माध्यमिक विद्यालय (भावे हायस्कूल) येथील माजी विद्यार्थी मेळाव्यात डॉ. संप्रसाद विनोद बोलत होते. कार्यक्रमात ज्येष्ठ माजी शिक्षकांचा सन्मान करण्यात आला. शाला समिती अध्यक्ष आनंद कुलकर्णी, रेखा भावे गोरे, बाळकाका इंदापूरकर, मुख्याध्यापक बी. डी. शिंदे, उपमुख्याध्यापक किसन यादव, पर्यवेक्षक बाळासाहेब जायभाय, माजी विद्यार्थी प्रतिनिधी रमेश बेंद्रे, आनंद सराफ, पराग गुजराथी, संकेत शिंदे, योगेश शहा उपस्थित होते. एकपात्री कलाकार मकरंद टिल्लू हे ही कार्यक्रमाला उपस्थित होते. कुलकर्णी म्हणाले, ‘‘शाळेचा प्रत्येक विद्यार्थी हा शाळेची संपत्ती आहे. शाळा आणि विद्यार्थी यामधील संबंध कायम घनिष्ठ राहिले आहेत. ही या शाळेची आणि एक प्रकारे शिक्षकांची मोठी कमाई आहे.’’ कार्यक्रमाचे प्रास्ताविक के. के. यादव यांनी, तर सूत्रसंचालन शिक्षिका गायत्री जवळगीकर यांनी केले.