‘पीएमपी’ बसचालकाला मारहाण
पुणे, ता. २१ : ‘बस नीट चालविता येत नाही का’, असे म्हणत एका कारचालकाने पीएमपी बसचालकास शिवीगाळ करून मारहाण केली. ही घटना मुंढवा चौकाजवळ एका कार सर्व्हिस सेंटरसमोर सोमवारी घडली. याप्रकरणी पीएमपी बसचालक इरबा मारुती इबितदार (वय ३०, रा. केसनंद रस्ता, वाघोली) यांनी फिर्याद दिली आहे. त्यावरून मुंढवा पोलिसांनी गुन्हा दाखल केला आहे. पोलिसांनी दिलेल्या माहितीनुसार, पीएमपी बसचालक इबितदार हे मगरपट्टा-मुंढवा रस्त्याने सकाळी दहाच्या सुमारास वाघोलीच्या दिशेने निघाले होते. मुंढवा चौकात एका कारचालकाने बसला पाठीमागून धडक दिली. त्यावेळी कारचालकाने बसचालकाला शिवीगाळ करून खाली ओढून मारहाण केली. या घटनेनंतर कारचालक पसार झाला आहे. पुढील तपास पोलिस उपनिरीक्षक प्रमोद कोळेकर करत आहेत.

टेम्पोच्या धडकेने दुचाकीस्वाराचा मृत्यू
पुणे, ता. २१ : भरधाव टेम्पोच्या धडकेने एका दुचाकीस्वाराचा मृत्यू झाल्याची घटना कात्रज परिसरातील जैन मंदिराजवळ घडली. हा अपघात सोमवारी दुपारी चार वाजण्याच्या सुमारास झाला. कैलास दत्तू मळेकर (वय ४०, रा. नेताजीनगर, कात्रज) असे मृत्युमुखी पडलेल्या दुचाकीस्वाराचे नाव आहे. याप्रकरणी मळेकर यांची पत्नी संगीता यांनी फिर्याद दिली आहे. त्यावरून टेम्पोचालकाविरुद्ध भारती विद्यापीठ पोलिस ठाण्यात गुन्हा दाखल करण्यात आला आहे. दुचाकीस्वार कैलास मळेकर हे कात्रज परिसरातून जात होते. त्यावेळी भरधाव टेम्पोने त्यांना धडक दिल्यामुळे मळेकर यांचा मृत्यू झाला. अपघातानंतर टेम्पोचालक पसार झाला आहे. पुढील तपास पोलिस उपनिरीक्षक मोहन देशमुख करत आहेत.