पुणे, ता. २३ : कॉन्फेडरेशन ऑफ इंडियन इंडस्ट्री (सीआयआय) पश्चिम क्षेत्राच्या अध्यक्षपदी टाटा पॉवर कंपनी लिमिटेडचे व्यवस्थापकीय संचालक आणि मुख्य कार्यकारी अधिकारी डॉ. प्रवीर सिन्हा यांची आणि उपाध्यक्षपदी व्ही. एम. सालगावकर आणि ब्रदर प्रायव्हेट लिमिटेडच्या अध्यक्ष स्वाती सालगावकर यांची निवड करण्यात आली. २०२३-२४ या वर्षासाठी ही निवड झाली आहे. सीआयआय पश्चिम क्षेत्राच्या बैठकीत या निवडी जाहीर करण्यात आल्या. वर्ष २०२३-२४ साठी सीआयआय पश्चिम क्षेत्रातील भारतीय व्यवसायांसाठीची थीम जागतिकीकरणाचा पुढील टप्पा आहे. लवचिक जागतिक व्यापार आणि गुंतवणुकीसाठी सर्वसमावेशक मूल्यसाखळी हे याचे प्रमुख वैशिष्ट्य आहे. कार्य, कौशल्य आणि गतिशीलतांचे भविष्य, डिजिटल परिवर्तन आणि आर्थिक पुनर्प्राप्तीसाठी वित्तपुरवठा, आर्थिक सक्षमीकरणासाठी विशेष उपक्रम राबविण्यात येणार आहेत. तसेच ऊर्जा, हवामान बदल आणि संसाधन कार्यक्षमता, तंत्रज्ञान, नवोपक्रम आणि संशोधन आणि विकास या प्रमुख बाबींवर सीआयआय पश्चिम विभाग कार्य करणार आहे, अशी माहिती ‘सीआयआय’कडून देण्यात आली.