पुणे, ता. २३ ः पुणे शहर व जिल्ह्याच्या ग्रामीण भागात चित्ररथाच्या माध्यमातून सामाजिक न्याय विभागामार्फत अनुसूचित जातीसाठी राबविण्यात येत असलेल्या योजनांबाबत जनजागृती करण्यासाठी दोन चित्ररथ (एलईडी डिस्प्ले व्हॅन) तयार करण्यात आले आहेत. या चित्ररथांच्या माध्यमातून ग्रामीण भागातील सुमारे दीडशे गावांमध्ये सरकारी योजनांबाबत जिल्हा माहिती कार्यालयाच्यावतीने ही जागृती करण्यात येत आहे.

अनुसूचित जाती व जमातीच्या विकासासाठी राबविण्यात येत असलेल्या योजनांवर आधारित विविध विषयांवरील लघुचित्रफिती तयार करण्यात आल्या आहेत. या चित्ररथाच्या माध्यमातून आतापर्यंत पुणे शहरातील कोंढवे धावडे, किरकटवाडी, बिबवेवाडी, शंकर महाराज वसाहत, तळजाई वसाहत, सिद्धार्थ वसाहत, अंबिल ओढा, कासेवाडी, रामटेकडी, पर्वती दर्शन, पर्वती पायथा, दत्तवाडी, दांडेकर पूल, शिवदर्शन वसाहत भागात जनजागृती करण्यात आली आहे. यशिवाय हवेली तालुक्यातील खडकवासला, खेड शिवापूर, वडकी, कदमवाकवस्ती, लोणी काळभोर, थेऊर, मांजरी खुर्द, कुंजीरवाडी, उरुळी कांचन, हिंगणगाव, सासवड, जेजुरी येथेही जागृती करण्यात आली. तसेच बारामती तालुक्यातील निंबूत, वाघळवाडी, वाणेवाडी, करंजे, मुरूम, होळ, वडगाव निंबाळकर, कोऱ्हाळे खुर्द, कोऱ्हाळे बुद्रूक, थोपटेवाडी, लाटे माळवाडी, कांबळेश्वर, सांगवी, पवईमाळ, पणदरे, माळेगाव बुद्रूक, खांडज, नीरा वागज, मेखळी आणि सोनगाव या गावांमध्येही योजनांबाबत जनजागृती करण्यात आली आहे.