पुणे, ता. ५ : महावितरणचा ६ जूनला १८ वा वर्धापन दिन पार पडला. त्यानिमित्त पुणे परिमंडलाकडून ५ ते ९ जूनपर्यंत विविध उपक्रमांचे आयोजन करण्यात आले आहे. छतावरील सौर ऊर्जा प्रकल्प, मुख्यमंत्री सौर कृषिवाहिनी योजना २.०, इलेक्ट्रिक वाहन चार्जिंग स्टेशनसह महावितरणच्या विविध योजना व ग्राहकसेवांची माहिती देणाऱ्या पाच दिवसीय सौर रथयात्रेचा सोमवारी मुख्य अभियंता राजेंद्र पवार यांच्या हस्ते प्रारंभ झाला. या सौर रथयात्रेद्वारे येत्या ९ जूनपर्यंत पुणे परिमंडल अंतर्गत सर्वच ४१ उपविभाग कार्यालयांच्या क्षेत्रात वीजग्राहकांचे प्रबोधन करण्यात येईल.

पर्यावरण दिनाचे औचित्य साधून सौर रथयात्रेला प्रारंभ करण्यात आला आहे. रास्तापेठ येथील प्रशासकीय इमारतीच्या प्रांगणात मुख्य अभियंता पवार यांनी झेंडा दाखवून या यात्रेचा शुभारंभ केला. या वेळी अधीक्षक अभियंता अरविंद बुलबुले, युवराज जरग, संजीव राठोड तसेच ‘मास्मा’चे अध्यक्ष रोहन उपासनी, सचिव स्वप्नील बाथे, प्रदीप कुलकर्णी, संजय कुलकर्णी, समीर गांधी, योगेश गोसावी, सुनील मुसळे, श्रीधर भामधिपती यांच्यासह महावितरणचे अभियंते, अधिकारी व कर्मचारी उपस्थित होते. या यात्रेचे समन्वयक म्हणून उपकार्यकारी अभियंता डॉ. संतोष पटनी काम पाहत आहे. दरम्यान, पर्यावरण दिनानिमित्त महावितरण व ऑल इंडिया रिन्यूएबल एनर्जी असोसिएशनच्या वतीने रास्तापेठ येथून गणेशखिंडपर्यंत इ-बाईक रॅली काढण्यात आली. अधीक्षक अभियंता बुलेबुले यांच्यासह या रॅलीमध्ये ४५ जण सहभागी झाले होते. गणेशखिंड येथे रॅलीचा समारोप झाला.