पुणे, ता. २८ : निवडणूक आयोगाच्या आदेशानुसार मतदार यादीच्या विशेष संक्षिप्त पुनर्रिक्षण कार्यक्रमांतर्गत पुणे जिल्ह्यात दिव्यांग व्यक्तींच्या मतदार नाव नोंदणीसाठी दिव्यांगांच्या विशेष शाळांमध्ये ९ डिसेंबरपर्यंत शिबिरे होणार आहेत. शिबिरांच्या माध्यमातून नागरिकांकडून मतदार नोंदणीचे, मतदार यादीतील नोंदीच्या दुरुस्ती किंवा नाव वगळणीचे अर्ज मागविण्यात येत आहेत. याशिवाय दिव्यांग व्यक्तींची मतदार यादीतील नोंद चिन्हांकित करणे व निवडणूक आयोग मतदानाच्या दिवशी दिव्यांगांना पुरवत असलेल्या सुविधांबाबत माहिती देण्यात येणार आहे. तसेच दिव्यांग बांधवांना मतदार नोंदणीसाठी https://voters.eci.gov.in/ या संकेतस्थळावर किंवा Voter Search Helpline या मोबाईल ॲपद्वारेदेखील अर्ज भरता येतील. या सुविधेचा जास्तीत जास्त दिव्यांग बांधवांनी लाभ घ्यावा, असे आवाहन जिल्हाधिकारी डॉ. राजेश देशमुख यांनी केले आहे.