येत्या मंगळवारी पुण्यात
विश्वकरंडकाची मिरवणूक
पुणे, ता. २२ : महाराष्ट्र क्रिकेट संघटनेने येत्या मंगळवारी (ता. २६) क्रिकेटच्या विश्वकरंडकाची भव्य मिरवणूक पुण्यात आयोजित केली आहे.
महाराष्ट्र क्रिकेट संघटनेचे अध्यक्ष रोहित पवार यांनी याविषयी अधिक माहिती दिली. त्यांनी सांगितले की, पाच ऑक्टोबरपासून ही स्पर्धा सुरु होत आहे. विशेष बाब म्हणजे तब्बल २७ वर्षानंतर पुण्यात पुरुषांच्या विश्वकरंडकाचे सामने होणार आहेत. आम्हाला पाच सामन्यांचे यजमानपद मिळाले आहे. गहुंजे येथील आंतरराष्ट्रीय स्टेडियमवर १९ ऑक्टोबरचा बांगलादेशविरुद्धचा सामना आकर्षण असेल. पुण्यातील क्रिकेटप्रेमींना विश्वकरंडक प्रत्यक्ष बघता यावा आणि सेल्फी सुद्धा काढता यावा म्हणून आम्ही शिवाजीनगर येथील कृषी महाविद्यालयाच्या मैदानावर कार्यक्रम ठेवला आहे. आपले आंतरराष्ट्रीय खेळाडू, पदाधिकारी, महाराष्ट्राचा कर्णधार केदार जाधव, ऋतुराज गायकवाड तसेच आजी-माजी खेळाडू यांच्या उपस्थितीत मिरवणूक निघेल. दुपारी एक वाजता सेनापती बापट रस्त्यावरील हॉटेल जे. डब्ल्यू. मॅरिएट पासून सिंबायोसिस कॉलेज, बीएमसीसी कॉलेज, मराठवाडा मित्र मंडळ कॉलेज येथून फर्ग्युसन रस्त्याने कृषी महाविद्यालयापर्यंत असा मार्ग असेल. कृषी महाविद्यालयाच्या मैदानावर सायंकाळी ४.३० ते ६ वाजण्याच्या दरम्यान क्रिकेटरसिकांना विश्वकरंडक बघता येईल."
या मिरवणुकीत सुपरबाईक रॅली, सायकल रॅली, ढोल-ताशा पथक आणि फ्लॅश मॉब हे विशेष आकर्षण असेल. यावेळी क्रिकेटप्रेमींनी मोठ्या संख्येने सहभागी व्हावे, असे आवाहनही त्यांनी केले.
-----