पुणे, ता. १३ ः पहाटे धुके अन् दिवसभर उन्हाचे चटके, पुणे शहर व परिसरात सध्या हवामानाची स्थिती अशीच कायम आहे. एकीकडे मॉन्सून पुण्यातून परतला असून दुसरीकडे हवामान कोरडे असल्याने शहरातील कमाल तापमान वाढ होत आहे. यामुळे उन्हाच्या झळा तीव्र होत आहेत.
शहरात शुक्रवारी (ता. १३) ३४.४ अंश सेल्सिअस कमाल तापमानाची नोंद झाली. सरासरीपेक्षा तापमानात वाढ कायम असून दिवसा उन्हाचा ताप देखील वाढला आहे. मात्र, रात्रीच्या वेळी काहीसा गारवा देखील जाणवत असून पुढील आठवडाभर शहर आणि परिसरात उन्हाचा चटका असाच कायम राहण्याचा अंदाज आहे.
राज्यातही हवामानाची स्थिती अशीच असून शुक्रवारी सकाळपर्यंतच्या २४ तासांमध्ये राज्यातील उच्चांकी तापमानाची नोंद अकोला येथे ३७.५ अंश सेल्सिअस इतकी झाली. राज्यातील बऱ्याच ठिकाणी कमाल तापमान हे ३५ अंश व त्यापेक्षा पुढे आहे. विदर्भात तर उन्हाचे चटके अधिक वाढले असून राज्यात ऑक्टोबर हीटचा प्रभाव कायम आहे. सध्या पावसाचे सावट नसून निरभ्र व कोरड्या हवामानामुळे राज्यात शनिवारी (ता. १४) उन्हाचा ताप सहन करावा लागणार आहे.