पुणे, ता. २१ ः सावित्रीबाई फुले पुणे विद्यापीठाच्या ललित कला केंद्र गुरुकुलातर्फे दरवर्षीप्रमाणे यंदाही ‘ललित पौर्णिमा उत्सवा’चे आयोजन करण्यात आले आहे. शनिवारी (ता. २५) रात्री ९.३० वाजता ललित कला केंद्राच्या अंगणमंचात सुरू होणारा हा कार्यक्रम दुसऱ्या दिवशी सकाळी ७ वाजेपर्यंत म्हणजे संपूर्ण रात्रभर सुरू असेल. या कार्यक्रमात प्राची वैद्य यांचे ‘आदिम गीत कथा’, ऋतुजा सोमण यांचे कथक नृत्य, डॉ. रुचिरा केदार यांचे ठुमरी व दादरा गायन, रुचिका खोत यांचा ‘द्रौपदी’, शुभम साठे यांचा ‘मेड इन इंडिया’, जान्हवी मराठे यांचा ‘जो आहा सो आहा’, संकेत खेडकर यांचा मूकाभिनय आदी विविधरंगी सादरीकरण पाहायला मिळतील.
----
‘भारतीय धर्मसंगीत’ पुस्तकाचे शुक्रवारी प्रकाशन
पुणे, ता. २१ ः डॉ. केशवचैतन्य कुंटे लिखित ‘भारतीय धर्मसंगीत’ या पुस्तकाचा प्रकाशन सोहळा शुक्रवारी (ता. २४) सायंकाळी ६.३० वाजता टिळक रस्त्यावरील ज्योत्स्ना भोळे सभागृहात होणार आहे. पॉप्युलर प्रकाशन आणि महाराष्ट्र कल्चरल सेंटर यांच्यातर्फे हा सोहळा आयोजित करण्यात आला आहे. ज्येष्ठ गायिका डॉ. अश्विनी भिडे-देशपांडे यांच्या हस्ते प्रकाशन होणार असून, डॉ. मिलिंद मालशे आणि डॉ. श्रीकांत बहुलकर याप्रसंगी उपस्थित असतील. यानिमित्ताने ‘विविध धर्मपरंपरांतील संगीत’ हा दृकश्राव्य कार्यक्रम डॉ. कुंटे सादर करणार आहेत.