पुणे, ता. १० ः राज्यातील कोरोनाची स्थिती नियंत्रणात आहे. तसेच राज्य सरकार विविध स्तरांवर पुरेशी खबरदारी घेत आहे, असे स्पष्टीकरण आरोग्यमंत्री तानाजी सावंत यांनी केंद्र सरकारच्या बैठकीत येथे दिले. कोरोनाच्या नव्या व्हेरिंएटबाबत केंद्रीय आरोग्यमंत्री मनुसख मांडविया यांनी सर्व राज्यांच्या आरोग्यमंत्र्यांशी व्हिडिओ कॉन्फरन्सिंगद्वारे संवाद साधला. तेव्हा परिस्थितीचा आढावा घेताना उपाययोजनांबाबत सावंत यांनी माहिती दिली. ट्रॅकिंग, ट्रेसिंग, ट्रीटमेंट यावर भर देण्यात यावा, आरटीपीसीआर तपासणीमध्ये वाढ करावी, तसेच सर्व यंत्रणा सुसज्ज ठेवून तयारी अद्ययावत करावी, नवीन व्हेरियंट हा सौम्य स्वरूपाचा असल्यामुळे घाबरण्याचे कारण नाही; परंतु धोके टाळण्यासाठी सर्व राज्यांनी काळजी घ्यावी व कोविड अनुरूप वर्तनाचे पालन करावे यावर भर द्यावा आदी सूचना मांडविया यांनी या वेळी केल्या. बैठकीला केंद्रीय आरोग्य राज्यमंत्री डॉ. भारती पवारही उपस्थित होत्या.