पुणे, ता. १० : विद्यार्थ्यांना मिळणारी शिष्यवृत्ती, मागासवर्गीय बढतीमधील आरक्षण, जातीनिहाय जनगणना, शिक्षणातील खाजगीकरण, खासगी क्षेत्रात आरक्षण आणि कामगारांविरुद्ध कायदे, अशा विविध प्रश्नांसंदर्भात आरक्षण हक्क कृती समितीच्यावतीने मंगळवारी (ता. ११) राज्यभरात जन आंदोलन करण्यात येणार आहे.

महात्मा जोतिराव फुले यांच्या जन्मदिनी मंगळवारी (ता. ११) रोजी त्यांना अभिवादन करून मुंबर्इतील आझाद मैदानात आंदोलनाची सुरुवात करण्यात येणार आहे, अशी माहिती समितीचे समन्वयक माजी खासदार हरिसिंग राठोड यांनी सोमवारी (ता. १०) पत्रकार परिषदेत दिली.
महाविकास आघाडी सरकार असो किंवा आताचे शिंदे-फडणवीस सरकार हे मागासवर्गीय तथा कामगार, अधिकारी, कर्मचारी, शेतमजूर आणि शेतकऱ्यांच्या विरोधातील सरकार आहे. गेल्या अनेक वर्षांपासून बढतीमधील आरक्षणाबाबत राज्य सरकार यांच्याकडे आम्ही वारंवार मागणी करीत असून अनेक निदर्शने देखील केली. मात्र, आंदोलने करून देखील या सरकारने कुठलीही दखल घेतलेली नाही. उलट हे सरकार मागासवर्गीयांच्या कुठल्याच विषयाबाबत गंभीर नसून केवळ वेळकाढूपणाचे धोरण अवलंबत आहे. त्यामुळे आंदोलन करणार आहे, असे राठोड यांनी सांगितेल.