पुणे, ता. २२ : केशवराव जेधे यांनी कोणत्याही टोकाच्या भूमिका न घेता, सातत्याने बहुजनांच्या सांस्कृतिक आणि आर्थिक उत्थानासाठी संघर्ष केला. सत्तेच्या राजकारणात ते कालांतराने मागे पडले असले तरी बहुजनांच्या प्रगतीसाठी त्यांनी घेतलेली सकलजनवादी भूमिका आजही वाखाणण्याजोगी आहे, असे मत ज्येष्ठ विचारवंत आणि शिवाजी विद्यापीठातील राज्यशास्त्र विभागाचे प्रमुख डॉ. प्रकाश पवार यांनी मांडले.

देशभक्त केशवराव जेधे यांच्या १२७ व्या जयंतीनिमित्त सावित्रीबाई फुले पुणे विद्यापीठाचा इतिहास विभाग आणि देशभक्त केशवराव जेधे फाउंडेशनच्यावतीने स्मृती व्याख्यानाचे आयोजन केले. त्यावेळी ते बोलत होते. विश्वकोश निर्मिती मंडळाचे अध्यक्ष डॉ. राजा दीक्षित यांनी या सभेचे अध्यक्षपद भूषविले.

जेधे फाउंडेशनचे अध्यक्ष दिग्विजय जेधे, खजानीस राजलक्ष्मी जेधे, सचिव अनिल पवार यांनी प्रमुख पाहुण्यांचे स्वागत केले. तर इतिहास विभागप्रमुख डॉ. श्रद्धा कुंभोजकर यांनी प्रास्ताविक केले. प्रा. बाबासाहेब दुधभाते यांनी आभार मानले. तर भक्ती धुपकर यांनी सूत्रसंचालन केले.