पुणे, ता. ११ ः पुणे महापालिकेत २०२१ मध्ये समाविष्ट झालेल्या २३ गावांना आता मिळकतकरात ४० टक्के सवलत मिळणार आहे. ग्रामपंचायतींकडे नोंद असलेल्या मिळकतींसह २०२१ नंतर महापालिकेकडे नोंद झालेल्या मिळकतींनाही ही सवलत लागू करण्याचा निर्णय महापालिकेने घेतला आहे.
पुणे महापालिकेतर्फे १९७० पासून स्वतः राहत असलेल्या एका मिळकतीला ४० टक्के सवलत दिली जात होती. ही सवलत एप्रिल २०१९ पासून बंद करण्यात आली. त्यामुळे ४० टक्के करात वाढ झाली. त्यानंतर ज्या नागरिकांना कर भरावा लागला, नोटिसा पाठविण्यात आल्या, त्यांना मिळकतकराची रक्कम बघून डोळे पांढरे होण्याची वेळी आली. २०१९ ते २०२२ या कालावधीत सुमारे दोन लाख नागरिकांनी अडीचशे कोटींची रक्कम महापालिकेकडे जमा केली आहे. आता ही ४० टक्के सवलत पुन्हा एकदा लागू झाल्याने ज्या नागरिकांनी पैसे भरलेत, त्यांची ही रक्कम पुढील चार वर्षांत मिळकतकरात वळती केली जाणार आहे.
पुणे महापालिकेत २०२१ मध्ये २३ गावे समाविष्ट करण्यात आली. नवीन गावे समाविष्ट झाल्यानंतर पहिल्या वर्षी एकूण कराच्या २० टक्के, दुसऱ्या वर्षी ४० टक्के, तिसऱ्या वर्षी ६० टक्के, चौथ्या वर्षी ८० आणि पाचव्या वर्षी १०० टक्के कर आकारणी केली जाते. मात्र, राज्य सरकारने सवलत पुन्हा लागू केल्याने आता तेथील मिळकतधारकांना ४० टक्के सलवतीसह बिल पाठविले जाणार आहेत. मात्र या नागरिकांनी १५ नोव्हेंबर २०२३ पर्यंत ते संबंधित मिळकतीमध्ये स्वतः राहत असल्याचा पुरावा महापालिकेकडे जमा करणे आवश्‍यक आहे.

महापालिकेत २०२१ मध्ये समाविष्ट झालेल्या गावांमध्ये यंदा एकूण कराच्या २० टक्के कर आकारला जाणार आहे. तेथे निवासी मिळकतीमध्ये स्वतः राहणाऱ्या मिळकतधारकास ४० टक्के सवलत दिली जाणार आहे. पण अशा नागरिकांनी १५ नोव्हेंबर २०२३ पर्यंत ते मिळकतीमध्ये स्वतः राहत असल्याचे पुरावे महापालिकेकडे जमा करावेत, अन्यथा पुढच्या वर्षाच्या करात ही सवलत मिळणार नाही.
- अजित देशमुख, उपायुक्त, मिळकतकर विभाग

पुणे महापालिकेतर्फे मिळकतकरात ४० टक्के सवलत दिली जाणार असली तरी २०२१ मध्ये समाविष्ट झालेल्या गावांमधील नागरिकांना ती मिळणार की नाही, याबाबत संभ्रम आहे. सवलत मिळणार असलेल्या ज्या नागरिकांनी यापूर्वी कर भरला आहे, त्यांची रक्कम पुढील बिलात वळती करून घ्यावी.
- माधवी सोळसकर, नागरिक

२३ गावांतील मिळकतींची स्थिती
- निवासी मिळकती ः १ लाख ८२ हजार १६४
-बिगरनिवासी मिळकती ः १४ हजार ३५१
- मोकळ्या जागा - ७००
- मिश्र - ३७१९
- एकूण मिळकती - २ लाख ९३४