पुणे विभागातील तीन जिल्हे टॅंकरमुक्त
जिल्ह्यात सर्वाधिक २२ टॅंकर सुरू; कोल्हापूर, सोलापूर, सांगलीचाही समावेश
पुणे, ता. ११ ः पुणे विभागातील पाचपैकी कोल्हापूर, सोलापूर आणि सांगली या तीन जिल्ह्यांमधील एकाही गावांना अद्यापपर्यंत टँकरद्वारे पाणीपुरवठा करण्याची वेळ आलेली नाही. त्यामुळे आतापर्यंत हे तीनही जिल्हे टँकरमुक्त आहेत. सध्या पुणे विभागातील पुणे व सातारा या दोनच जिल्ह्यात २९ टँकरद्वारे पिण्याच्या पाण्याचा पुरवठा करण्यात येत आहे. यापैकी सर्वाधिक २२ टँकर हे पुणे जिल्ह्यात सुरू झाले आहेत. या टँकरच्या माध्यमातून विभागातील ३९ गावे १६६ वाड्यांमधील ६२ हजार नागरिकांना पिण्याच्या पाण्याचा पुरवठा करण्यात येत आहे.

सध्या पुणे जिल्ह्यातील १३पैकी आंबेगाव, भोर, खेड, जुन्नर या चारच तालुक्यात टॅंकर सुरु आहेत. उर्वरित १३ तालुके अद्यापही टँकरमुक्त आहेत. जिल्ह्यातील अद्यापपर्यंत टँकरमुक्त असलेल्या नऊ तालुक्यांमध्ये दुष्काळी समजल्या जाणाऱ्या बारामती, इंदापूर, दौंड, पुरंदर, शिरूर आदी तालुक्यांसह मावळ, मुळशी, हवेली, वेल्हे या तालुक्यांचा समावेश आहे. सध्या टँकर सुरु असलेल्या चार तालुक्यांमधील ३१ गावे आणि १४६ वाड्यांना टॅंकरद्वारे पिण्याच्या पाण्याचा पुरवठा केला जात आहे. जिल्ह्यात पाणीटंचाईची सर्वाधिक झळ ही आंबेगाव तालुक्याला बसली आहे. या तालुक्यातील आठ गावे आणि ४४ वाड्यांना नऊ टॅंकरद्वारे पिण्याचे पाणी पुरविण्यात येत असल्याचे जिल्हा परिषदेच्या ग्रामीण पाणीपुरवठा विभागातून सांगण्यात आले.
सद्यःस्थितीत पुणे विभागातील ६२ हजार ५८२ इतकी लोकसंख्या ही पाण्याअभावी तहानलेली आहे. या सर्व लोकसंख्येला २९ टॅंकरद्वारे पिण्याच्या पाण्याचा पुरवठा करण्यात येत आहे. हे सर्व टॅंकर फक्त पुणे आणि सातारा या दोनच जिल्ह्यात सुरु आहेत. पुणे विभागातील एकूण टॅंकरपैकी १२ सरकारी आणि १७ खासगी टॅंकर आहेत. या गावांना टॅंकरद्वारे पिण्याच्या पाण्याचा पुरवठा करण्यासाठी ३२ खासगी विहीरी व विंधनविहिरींचे अधिगृहण करण्यात आल्याचे विभागीय आयुक्त कार्यालयातून सांगण्यात आले.