अभियांत्रिकी अभ्यासक्रमासाठी
अर्ज आज शेवटचा दिवस

पुणे, ता. २ : बारावीनंतरच्या अभियांत्रिकी आणि तंत्रज्ञान पदवी अभ्यासक्रमाच्या प्रवेशासाठी ऑनलाइन नोंदणी, अर्ज भरणे व कागदपत्रे अपलोड करण्याची मुदत सोमवारी (ता. ३) संपत आहे. महाराष्ट्र राज्य सामाईक प्रवेश परीक्षा कक्षातर्फे (सीईटी सेल) बी.ई. आणि बी.टेक या चार वर्षांच्या अभ्यासक्रमांच्या पहिल्या वर्षासाठी प्रवेशप्रक्रिया सुरु आहे. यास मुदतवाढ मिळावी अशी मागणी विद्यार्थी-पालकांकडून होत आहे. परंतु त्यावर अद्याप निर्णय जाहीर करण्यात आलेला नाही. राज्यातील शासकीय, अनुदानित, विद्यापीठाचे व्यवस्थापन असणाऱ्या संस्था आणि विभाग, विनाअनुदानित खासगी व्यावसायिक शिक्षण संस्थांमध्ये यंदाच्या शैक्षणिक वर्षासाठी प्रवेशप्रक्रिया सुरु आहे. कागदपत्रांची पडताळणी, अर्ज निश्चिती करण्यासाठी मंगळवारपर्यंत (ता. ४) मुदत आहे. प्रवेशाचे पुढील वेळापत्रक लवकरच जाहीर करण्यात येईल, असे यापूर्वीच जाहीर झाले आहे. अधिक माहितीसाठी संकेतस्थळ ः www.mahacet.org
-----