पुणे, ता. ६ : पुणे, पिंपरी-चिंचवड भागात असलेल्या दस्तनोंदणी कार्यालयांतील अपुऱ्या सुविधा, जागेचा अभाव तसेच सर्व्हर डाउनमुळे नागरिकांना मनस्ताप सहन करावा लागत आहे. यावर नागरिकांना दिलासा देण्यासाठी १५ जुलैपासून शहरातील २७ दुय्यम निबंधक कार्यालयांत ‘टोकन’ पद्धतीचा अवलंब करण्यात येणार आहे. ही पद्धत प्रायोगिक तत्त्वावर असणार आहे. ती यशस्वी झाल्यास १५ ऑगस्टपासून दोन्ही शहरांमध्ये कायमस्वरूपी हीच पद्धत राबविण्यात येणार आहे.
पुणे, पिंपरी-चिंचवडमधील विविध दुय्यम निबंधक कार्यालयांमध्ये दस्तनोंदणीसाठी येणाऱ्या नागरिकांना मनस्ताप सहन करावा लागतो. त्यात दुय्यम निबंधक कार्यालयांत पाणी, शौचालये, स्वच्छतागृहे, अपुरी जागा अशा पायाभूत सुविधांचा अभाव, सर्व्हर डाउन होणे किंवा संथगतीने चालणे यांचा प्रामुख्याने समावेश आहे. कार्यालयांची ही स्थिती सुधारण्यासाठी मुद्रांक जिल्हाधिकाऱ्यांनी कर्मचारी आणि अधिकाऱ्यांची बैठक घेऊन उपाययोजना करण्याचा निर्णय घेतला आहे. सर्व्हरवर ताण येत असल्याने तो वारंवार डाउन होत असल्याचे प्रकार सातत्याने घडत आहेत. या पार्श्वभूमीवर आता १५ जुलैपासून प्रायोगिक तत्त्वावर टोकन पद्धती सुरू करण्यात येणार आहे, असे सहजिल्हानिबंधक संतोष हिंगाणे यांनी सांगितले.