पुणे, ता. ६ ः पुणे महापालिकेकडून आस्थापनेवरील वर्ग १ ते ३ या पदांच्या भरतीसाठी ऑनलाइन परीक्षा घेण्यात येणार आहे. संबंधित परीक्षेची जबाबदारी ‘आयबीपीएस’ या संस्थेवर असून या परीक्षेसाठी संस्थेला ५८ लाख रुपये आगाऊ देण्यास महापालिकेच्या स्थायी समितीमध्ये मान्यता देण्यात आली.

महापालिकेकडून घेण्यात येणाऱ्या वर्ग १ ते ३ वरील पदांसाठी सरळसेवा भरती प्रक्रिया राबविण्यात येणार आहे. यासाठी आवश्‍यक ऑनलाइन परीक्षा घेण्याची जबाबदारी ‘आयबीपीएस’ने घेतली आहे. त्यानुसार, या संस्थेस ६४ लाख ५१ हजार रुपये इतका खर्च येणार आहे, दरम्यान, या परीक्षेसाठी एकूण रकमेच्या ९० टक्के म्हणजेच ५८ लाख रुपये इतकी आगाऊ रक्कम देण्यात यावी, याबाबतचा प्रस्ताव स्थायी समितीमध्ये मांडण्यात आला होता. त्यास महापालिका आयुक्तांनी मान्यता दिली. दरम्यान, परीक्षा प्रक्रिया पूर्ण झाल्यानंतर उर्वरित १० टक्के म्हणजेच साडे सहा लाख रुपयांची रक्कम संस्थेला दिले जाणार आहेत.