पुणे, ता. १० : विद्यार्थी-शिष्य-कलाकार-शिक्षक-गुरू हे अखंडितपणे सुरू राहणारे चक्र आहे. शास्त्र समजावले जाते, तंत्र शिकवले जाते, विद्या दिली जाते, तर कला मात्र संस्कारित होते. साधना संस्कारांशिवाय साध्य होत नाही आणि संस्कार गुरूशिवाय प्राप्त होत नाहीत, अशा शब्दांत ज्येष्ठ तबलावादक तालयोगी पं. सुरेश तळवलकर यांनी गुरू-शिष्य परंपरेचे महत्त्व विशद केले.
आवर्तन गुरुकुलतर्फे आयोजित गुरुपौर्णिमा महोत्सवाच्या अखेरच्या सत्रात शिष्यांनी गुरुपूजन केल्यानंतर त्यांना मार्गदर्शन करताना पं. तळवलकर बोलत होते. पं. तळवलकर यांचे पूजन ईशान परांजपे, ज्येष्ठ नृत्यगुरु सुचेता भिडे-चापेकर यांचे पूजन मुग्धा असनीकर, पं. रामदास पळसुले यांचे पूजन गणेश तानवडे आणि पं. निषाद बाकरे यांचे पूजन साहिल भोगले या शिष्यांनी प्रातिनिधिक स्वरूपात केले.
सुचेता भिडे-चापेकर म्हणाल्या, ‘‘अज्ञानाच्या अंध:कारात ज्ञानाचे काजळ डोळ्यात घालून गुरू शिष्याला मार्गदर्शन करत असतो. गुरूने शिकवलेले ज्ञान पचवून त्यात भर घालून शिष्याने पुढे न्यावे, अशी प्रत्येक गुरूची अपेक्षा असते. आवर्तन गुरुकुलाच्या माध्यमातून गुरू-शिष्य परंपरा प्रवाहित राहून शिष्यांना हक्काचे व्यासपीठ मिळत आहे.’’
तीन दिवसीय महोत्सवाच्या अखेरच्या दिवसातील सकाळच्या सत्रात पखवाज आणि तबलावादन झाले. दुसऱ्या सत्रात पं. रामदास पळसुले यांच्या शिष्यांचे तबलावादन झाले. विद्यार्थ्यांनी ताल दीपचंदीचे सादरीकरण केले. सायंकाळच्या सत्राची सुरुवात पं. निषाद बाकरे यांचे शिष्य साहिल भोगले यांच्या शास्त्रीय गायनाने झाली. समारोपाच्या सत्रात पं. सुरेश तळवलकर यांच्या शिष्यांचे तबलावादन झाले. ऋतुजा फुलकर यांनी सूत्रसंचालन केले.