पुणे, ता. १० ः दीपस्तंभ फाउंडेशनच्या मनोबलअंतर्गत पुण्यात प्रवेश प्रक्रिया सुरू झाली आहे. अठरा वर्षांवरील दिव्यांग व अनाथ विद्यार्थ्यांसाठी उच्च शिक्षण, विविध स्पर्धा परीक्षा प्रशिक्षण व तंत्रज्ञान प्रशिक्षणासाठी येथे ८० निवासी जागा उपलब्ध आहेत. अठरा वर्षावरील अस्थिव्यंग, अंध, कर्णबधिर, इतर दिव्यांग विद्यार्थ्यांना, तसेच आई व वडील दोन्ही नसणाऱ्या अनाथ विद्यार्थ्यांना प्रवेश दिला जातो.

याअंतर्गत यूपीएससी, एमपीएससी, बँक, एमबीए प्रवेश परीक्षा, एमएसडब्ल्यू प्रवेश परीक्षा इत्यादी स्पर्धा परीक्षांसाठी निवासी विनामूल्य मार्गदर्शन प्रशिक्षण दिले जाते. पदवी अथवा पदव्युत्तर शिक्षण घेणाऱ्या विद्यार्थ्यांना निवास, भोजन व्यवस्था व मार्गदर्शन केले जाते. अंध विद्यार्थ्यांना संगणक तंत्रज्ञानाचे प्रशिक्षण दिले जाते. तसेच व्यक्तिमत्त्व विकास प्रशिक्षण आणि करिअर मार्गदर्शन केले जाते. विविध दिव्यांग प्रकारातील विद्यार्थ्यांना त्यांच्या गरजांनुसार शिकवणारे तज्ञ मार्गदर्शक, विशेष तंत्रज्ञान व ॲक्सेसिबिलिटीसाठी आवश्यक सुविधा पुरविल्या जातात. या निवासी प्रकल्पासाठी विद्यार्थ्यांनी सविस्तर माहितीसह अर्ज ३० जुलैपर्यंत ९३७३६९५५६९ या क्रमांकावर अथवा दीपस्तंभ फाउंडेशन, मनोबल, भारती विद्यापीठ हॉस्पिटलच्या बाजूला, चैतन्य नगर, छोटा शंकर महाराज मठाजवळ, धनकवडी, पुणे या पत्त्यावर पाठवावे. गुणवत्तेनुसार व गरजेनुसार निवड प्रक्रियेद्वारे विद्यार्थ्यांना प्रवेश दिला जाईल, असे संस्थेतर्फे कळविण्यात आले आहे.