पुणे, ता. १० : घरातील आर्थिक अडचण दूर करण्याच्या बहाण्याने जादूटोणा आणि धार्मिक विधीच्या नावाखाली एका कुटुंबीयांकडून २८ लाखांचा ऐवज उकळल्याचा धक्कादायक प्रकार उघडकीस आला. या प्रकरणी विश्रांतवाडी पोलिस ठाण्यात महाराष्ट्र नरबळी, अमानुष, अघोरी कृत्य प्रतिबंध आणि जादूटोणा निर्मूलन कायद्यानुसार गुन्हा दाखल करण्यात आला आहे.

धानोरी परिसरात मार्च ते ऑगस्ट २०२१ या कालावधीत हा प्रकार घडला. याबाबत धानोरी येथील ३८ वर्षीय व्यक्तीने फिर्याद दिली. त्यावरून अभिषेक कुलकर्णी (वय ३५), विजय जाधव (वय ३०) आणि चालक सदाशिव फोडे (वय ३७, सर्वजण रा. इंदापूर) या तिघा संशयितांविरुद्ध विश्रांतवाडी पोलिसांनी गुन्हा दाखल केला आहे. पोलिसांनी दिलेल्या माहितीनुसार, आरोपींनी फिर्यादीला घरातील अडचणी दूर करण्यासाठी विश्वासात घेत जादूटोणा आणि धार्मिक विधी करावे लागतील, असे सांगितले. त्यानुसार फिर्यादीने धार्मिक विधीसाठी आरोपींच्या बॅंक खात्यात २० लाख ३५ हजार रुपये जमा केले. तसेच, आरोपींनी फिर्यादीच्या भावालाही विश्वासात घेत त्यांच्याकडून पावणेआठ लाख रुपये किमतीचे २६ तोळे सोन्याचे दागिने घेतले. फसवणूक झाल्याचे लक्षात आल्यानंतर फिर्यादीने विश्रांतवाडी पोलिस ठाण्यात तक्रार दिली. त्यानंतर तिघांविरुद्ध गुन्हा दाखल करण्यात आला आहे.