पुणे, ता. ११ : संघटित गुन्हेगारी नियंत्रण (मोका) कायद्यांतर्गत गुन्हा दाखल असलेल्या दोन सराईत गुन्हेगारांना गुन्हे शाखेच्या पथकाने बंगळूरमधून, तर अन्य एकाला अहमदनगरमधून अटक केली. या आरोपींवर वाहनांची तोडफोड करण्यासह इतर गंभीर स्वरूपाचे गुन्हे दाखल आहेत.
अजय चंद्रकांत विटकर (वय २२), ऋषिकेश ऊर्फ बबल्या सुनील देवकुळे (वय १९) आणि अनिकेत ऊर्फ डॅनी शंकर मंगळवेढेकर (वय २२, तिघे रा. वडारवाडी, गोखलेनगर) अशी अटक केलेल्यांची नावे आहेत.
चतु:शृंगी पोलिस ठाण्यात दाखल केलेल्या मोकाच्या गुन्ह्यातील तिघे सराईत गुन्हेगार फरार होते. त्यापैकी विटकर आणि देवकुळे हे बंगळूर शहरात लपून राहत असल्याची माहिती गुन्हे शाखेतील युनिट चारच्या पथकाला मिळाली. त्यानुसार या पथकाने त्यांना बंगळूरमधून ताब्यात घेतले. तसेच, अनिकेत मंगळवेढेकर हा अहमदनगर एमआयडीसी परिसरात लपून बसल्याची माहिती मिळाली. त्यानुसार युनिट चारच्या पथकाने त्याला ताब्यात घेतले. युनिट चारचे वरिष्ठ पोलिस निरीक्षक गणेश माने यांच्या पथकाने ही कारवाई केली.