पुणे, ता. १८ : पिंपरी-चिंचवड पोलिस आयुक्तालय व सदाबहार सिनिअर्स संघ बावधन यांच्या संयुक्त विद्यमाने बावधन येथील सूर्यदत्त ग्रुप ऑफ इन्स्टिट्यूट्समध्ये ज्येष्ठ नागरिक सहायता मेळावा झाला. या मेळाव्यात ज्येष्ठ नागरिकांना कायदेविषयक बाबीसंदर्भात मार्गदर्शन करण्यात आले. तसेच सूर्यदत्ततर्फे पिंपरी-चिंचवडचे पोलिस आयुक्त विनयकुमार चौबे यांना ‘सूर्यभूषण राष्ट्रीय पुरस्कार २०२३’ने सन्मानित करण्यात आले.

फाउंडेशनच्या उपाध्यक्ष सुषमा चोरडिया आणि मुख्य कार्यकारी अधिकारी अक्षित कुशल यांच्या हस्ते हा सन्मान प्रदान करण्यात आला. यासह पिंपरी चिंचवडचे पोलिस सहआयुक्त संजय शिंदे, पोलिस उपायुक्त डॉ. काकासाहेब डोळे, सहायक पोलिस आयुक्त डॉ. विशाल हिरे, वरिष्ठ पोलिस निरीक्षक डॉ. विवेक मुगळीकर यांना उत्कृष्ट प्रशासकीय सेवेबद्दल तर नीलकंठ बजाज, सी. एस. कृष्णन, वीणा मुरगुडकर, रामचंद्र खळदकर, आशा देशपांडे, किरण दगडे पाटील, दिलीप वेडे पाटील यांना ‘सूर्यगौरव राष्ट्रीय पुरस्कार २०२३’ प्रदान करण्यात आला. सहायक पोलिस निरीक्षक गणेश खारगे, पोलिस उपनिरीक्षक यशवंत साळुंके यांचाही या वेळी सन्मान करण्यात आला.