पुणे, ता. १८ ः केंद्रीय गृहमंत्री आणि भारतीय जनता पक्षाचे नेते अमित शहा यांच्यावरील ‘आधुनिक चाणक्य’ या चरित्र ग्रंथाचे प्रकाशन येत्या रविवारी (ता. २०) सकाळी १० वाजता नवी पेठेतील निवारा सभागृहात होणार आहे.
देवेंद्र रमेश राक्षे यांनी हा चरित्र ग्रंथ लिहिला आहे. उच्च तंत्रशिक्षण मंत्री आणि पालकमंत्री चंद्रकांत पाटील यांच्या हस्ते या पुस्तकाचे प्रकाशन होणार असून भाजपचे ज्येष्ठ नेते माधव भांडारी या प्रसंगी उपस्थित राहणार आहेत. भारतीय प्रशासकीय सेवेतील निवृत्त अधिकारी अविनाश धर्माधिकारी हे या चरित्रग्रंथावर विवेचन करणार आहेत. श्री गंधर्व वेद प्रकाशनाने हा ग्रंथ प्रकाशित केला आहे.
पुस्तकाचे प्रकाशक दीपक खाडीलकर म्हणाले, ‘‘देशाचे पहिले गृहमंत्री वल्लभभाई पटेल यांच्यानंतर अमित शहा यांच्या रूपात प्रथमच ताकदवान गृहमंत्री देशाला मिळाले आहेत. त्यामुळे शहा यांचे अभ्यासपूर्ण चरित्र समाजासमोर यावे, हा दृष्टिकोन समोर ठेवून या ग्रंथाचे लेखन केले आहे.’’ शहा यांच्या संपूर्ण कारकिर्दीचा आढावा, या पुस्तकात असल्याचे त्यांनी सांगितले.