पुणे, ता. २० ः ‘गणपती बाप्पा मोरया’च्या जयघोषात आणि मंगलमय वातावरणात केसरी गणेशोत्सवाला प्रारंभ झाला. टिळक पंचांगानुसार केसरीवाड्यात रविवारी दुपारी १२.२० वाजता गणरायाची प्रतिष्ठापना करण्यात आली. केसरीवाडा हा मानाचा पाचवा गणपती आहे.
ऐतिहासिक आणि वैभवशाली परंपरा असलेल्या या गणपतीच्या मिरवणुकीला रमणबाग चौकातून सकाळी ९.४५ वाजता प्रारंभ झाला. ढोल-ताशांच्या गजरात सुरू झालेल्या मिरवणुकीदरम्यान पावसाच्या हलक्या सरींनी हजेरी लावली. त्यामुळे ढोल-ताशा पथकातील वादकांचा आणि गणेशभक्तांचा उत्साह द्विगुणित झाला. ओंकारेश्वर मंदिर चौक, वर्तक उद्यान, नारायणपेठ पोलिस चौकी आणि केळकर मार्गाने केसरीवाड्यात मिरवणूक आली. टिळक वाड्यातील गणेश मंदिरासमोर अभिनव कलाभारतीतर्फे आकर्षक रांगोळी साकारण्यात आली होती.
‘केसरी’चे विश्वस्त-संपादक व टिळक महाराष्ट्र विद्यापीठाचे कुलपती डॉ. दीपक टिळक, विश्वस्त-सरव्यवस्थापक डॉ. रोहित टिळक, विश्वस्त डॉ. प्रणती टिळक, ‘केसरी’च्या विश्वस्त-व्यवस्थापिका डॉ. गीताली टिळक मिरवणुकीत सहभागी झाले होते. डॉ. रोहित आणि डॉ. प्रणती यांच्या हस्ते गणरायाची प्रतिष्ठापना करण्यात आली. या वेळी पोलिस आयुक्त रितेश कुमार, पोलिस सहआयुक्त संदीपसिंग गिल यांच्या हस्ते आरती करण्यात आली. गणेशोत्सवादरम्यान २४ ते २८ ऑगस्टपर्यंत दररोज सायंकाळी ६.३० वाजता केसरीवाड्यातील लोकमान्य सभागृहात विविध सांस्कृतिक कार्यक्रमांचे आयोजन करण्यात आले आहे.