पुणे, ता. २१ : पीएमपी बसमध्ये महिलांच्या सोन्याच्या बांगड्या चोरणाऱ्या दोघांना गुन्हे शाखेच्या दरोडा व वाहनचोरी विरोधी पथकाने अटक केली. त्यांच्या ताब्यातून २५ ग्रॅम वजनाची सोन्याची पाटली आणि कटर जप्त केले.
संतोष ऊर्फ मॅनेजर शरणप्पा जाधव (वय ४१, रा. मांजरी बुद्रूक, हडपसर, मूळ कर्नाटक) आणि सुधीर ऊर्फ तुंड्या नागनाथ जाधव (वय ४५, रा. शास्त्रीनगर, अंबरनाथ, जि. ठाणे) अशी अटक केलेल्यांची नावे आहेत. महिलांच्या सोन्याच्या बांगड्या कटरने तोडून चोरी करणारा सराईत गुन्हेगार संतोष जाधव आणि त्याचा साथीदार कोरेगाव पार्क परिसरातील एका चहाच्या हॉटेलजवळ असल्याची माहिती पोलिसांना समजली. त्यावरून दरोडा व वाहनचोरी विरोधी पथकाचे वरिष्ठ पोलिस निरीक्षक अशोक इंदलकर यांच्या पथकाने आरोपींना अटक केली. त्यांना शिवाजीनगर पोलिसांच्या ताब्यात देण्यात आले.