पुणे, ता. २४ ः सावित्रीबाई फुले पुणे विद्यापीठाच्या बी. व्होकमधील रिटेल मॅनेजमेंटच्या २९ विध्यार्थ्यांना इंटर्नशिपचे पत्र प्रदान करण्यात आले. विद्यापीठाचे व्यवस्थापन परिषदेचे सदस्य रवींद्र शिंगणापूरकर यांच्या हस्ते आणि कौशल्य विकास केंद्राचे संचालक डॉ. राधाकृष्ण पंडित, अभ्यासक्रमाचे समन्वयक डॉ. रवी आहुजा, डॉ. धनंजय मुंडे, रितु छाब्रा तसेच मारुती सुझुकी समूहाचे गुडगाव येथील व्यवस्थापक योगेश श्रीवास्तव, अंकुर डिगरा, सुशील वैद्य आणि पुण्यातील मारुती सुझुकी समूहाचे वितरक यांच्या उपस्थितीत हे पत्र प्रदान करण्यात आले.

शिंगणापूरकर म्हणाले, ‘‘विद्यापीठाच्या कौशल्य विकास केंद्राच्या अभ्यासक्रमामुळे विद्यार्थ्यांचा सर्वांगीण विकास होत आहे. यामार्फत स्वावलंबी बनत त्यांना अर्थार्जनाची संधीही प्राप्त होत आहे. भविष्यात यामध्ये विविध उद्योग समूहासोबत सामंजस्य करार करून याचा विस्तार करण्यात येईल.’’ विद्यापीठाने मारुती सुझुकी इंडिया लिमिटेड सोबत सामंजस्य करार करत नवीन बी. व्होक रिटेल मॅनेजमेंट हा अभ्यासक्रम २०२१ - २२ पासून सुरू केला आहे. यावर्षी या अभ्यासक्रमामार्फत दुसऱ्या बॅचला लेटर ऑफ इंटर्नशिप प्रदान झाल्यामुळे त्यांना प्रत्यक्ष काम करत शिक्षण घेण्याची संधी प्राप्त झाली आहे.