पबमध्ये प्रवेशावरून
युवकांचा वेटरवर हल्ला

पुणे, ता. २८ : पबमध्ये मध्यरात्री प्रवेश न दिल्याच्या कारणावरून तीन युवकांनी एका वेटरवर हत्याराने हल्ला केला. हा प्रकार मुंढवा परिसरात एबीसी रस्त्यावरील ताडीगुत्त्याजवळ शनिवारी (ता. २७) मध्यरात्री सव्वा दोन वाजण्याच्या सुमारास घडला.
या प्रकरणी वेटर धीरेंद्र अवदेश चौहान (वय २७, रा. धायरकर कॉलनी, मुंढवा) याने मुंढवा पोलिस ठाण्यात फिर्याद दिली. त्यावरून पोलिसांनी अबीद युसुफ खान (वय २०, रा. लोहियानगर) याला अटक करून त्याच्यावर सदोष मनुष्यवधाचा गुन्हा दाखल केला. धीरेंद्र हा सहकारी विक्रम उदाइन याच्यासोबत पायी जात होता. त्यावेळी आरोपी अबीद आणि त्याचे दोन साथीदार तेथे आले. त्यापैकी दोघांनी विक्रमला पकडून ठेवले. एकाने धीरेंद्रला जाब विचारत त्याच्या पाठीवार आणि डोक्यावर हत्याराने वार केले. धीरेंद्र गंभीर जखमी झाला असून त्याच्यावर रुग्णालयात उपचार सुरू आहेत. मुंढवा पोलिस ठाण्याचे वरिष्ठ पोलिस निरीक्षक अजित लकडे यांनी घटनास्थळी भेट दिली. पुढील तपास सहायक पोलिस निरीक्षक संदीप जोरे करीत आहेत.
-----