इमेज 46951
---
वाचन संस्कृतीसाठी साखळी उपक्रम
पुण्याच्या बालक पालक फाउंडेशनचा पुढाकार
पुणे, ता. १ : जिल्ह्याच्या दुर्गम भागात राहणाऱ्या अवघ्या तेरा वर्षीय अमृताला (नाव बदललेले आहे) एके दिवशी टपाल कार्यालयातून फोन आला. ती वडिलांबरोबर तेथे गेली. खाकी गणवेशातील पोस्टमन काकांनी तिचे नाव लिहिलेले पाकिट तिच्या हाती ठेवलं. ते पाहून ती अक्षरश: भारावून गेली. मोठ्या उत्सुकतेनं तिने पाकिट उघडलं आणि तिला गोष्टीचं छानसं पुस्तक मिळालं. ते ती मोठ्या आनंदाने सगळ्यांना दाखवत गेली.
होय! ग्रामीण आणि निमशहरी भागातील अमृतासारख्या मुला-मुलींना अशाप्रकारे नावाने पुस्तके पाठविण्याचा ‘वाचन साखळी’ उपक्रम बालक पालक फाउंडेशनच्या उपक्रम गेल्या वर्षापासून राबवीत आहे. विविध तालुक्यांतील शालेय विद्यार्थ्यांना पुस्तके पोस्टाने पाठविली जातात. शैक्षणिक वर्षाच्या प्रारंभी एक जूनपासून या उपक्रमाला सुरवात झाली.
पालकांच्या मदतीने इच्छुक विद्यार्थी संस्थेशी ऑनलाइन संपर्क साधतात. गुगल फॉर्मद्वारे नावनोंदणी केली जाते. त्यानंतर संबंधित विद्यार्थ्यांच्या हस्ताक्षरात त्याचा पत्ता मागविला जातो. निवड झालेल्या विद्यार्थ्यांना पुस्तकाच्या दोन प्रती पाठविण्यात येतात. त्यातील एक प्रत विद्यार्थ्यांने स्वत:कडे तर दुसरी प्रत समवयस्क मित्रास किंवा मैत्रिणीस भेट द्यायची. अशा प्रकारे वाचन साखळी बनविली जाते. आवड लक्षात घेऊन लाभार्थी निवडण्यात येतात.
विद्यार्थ्यांनी दिलेले पुस्तक वाचले की नाही, हे पाहण्यासाठी पुस्तकावरील प्रतिक्रिया मागविण्यात येतात. अशाप्रकारे विद्यार्थ्यांशी अनोखे नाते तयार करण्यात येते. व्यक्तीगत आणि संस्थात्मक देणगीदारांच्या सहयोगातून उपक्रम विनामूल्य राबविण्यात येतो. यंदा एक हजार मुलांची वाचन साखळी करण्याचा संस्थेचा मानस आहे. अधिक माहितीसाठी संपर्क क्रमांक : ८८५६८६२७११
---
मुलांना पुस्तकांचा सहवास लाभावा, कोऱ्या पुस्तकाला हात लावण्याचा, ते चाळण्याचा आनंद घेता यावा, त्यातून वाचनाची गोडी लागावी या उद्देशाने हा उपक्रम राबविण्यात येत आहे.
- विनायक जोशी, संस्थापक-अध्यक्ष, बालक पालक फाउंडेशन
-----