पुणे, ता. १४ ः राज्यस्तरीय प्राध्यापक पात्रता परीक्षा अर्थात सेटचा निकाल जूनअखेरपर्यंत घोषित होईल, अशी माहिती सावित्रीबाई फुले पुणे विद्यापीठाच्या वरिष्ठ अधिकाऱ्यांनी दिली आहे. अंतरिम उत्तरतालिका घोषित झाल्यानंतर उमेदवारांमध्ये निकालाची प्रतीक्षा आहे. विद्यापीठाच्या वतीने २६ मार्चला राज्यभर ही परीक्षा घेण्यात आली होती. उत्तरतालिका घोषित केल्यानंतर दोन आठवड्यांतच निकाल जाहीर करण्यात येणार असल्याचे विद्यापीठाने म्हटले होते. मात्र, आता पुन्हा निकाल लांबल्याचे समजले असून, अधिकाऱ्यांना विचारले असता जूनच्या शेवटच्या आठवड्यात तो घोषित होईल, असा विश्वास व्यक्त केला.