पुणे, ता. १५ : समाजवादी लोकनेते भाई वैद्य यांच्या ९५ व्या जयंतीचे औचित्य साधून भाई वैद्य फौंडेशन आणि आरोग्य सेना यांच्यातर्फे दिला जाणारा ‘लोकनेते भाई वैद्य युवा नेता पुरस्कार २०२३’ हा राष्ट्रीय स्तरावरील पुरस्कार ऑक्सफर्ड आणि हार्वर्ड विद्यापीठातील स्कॉलर डॉ. सूरज एंगडे यांना जाहीर झाला आहे. तर ‘प्राचार्या नलिनीताई वैद्य समाजाभिमुख शिक्षक पुरस्कार २०२३’ चंद्रपूर जिल्ह्यातील वैशाली पुंडलिकराव अंजली गेडाम यांना देणार असल्याची माहिती फौंडेशनच्या चिटणीस प्रा. डॉ. गीतांजली वैद्य आणि आरोग्य सेनेचे सरचिटणीस लक्ष्मीकांत मुंदडा यांनी पत्रकाद्वारे दिली आहे.
हा पुरस्कार प्रदान सोहळा लेखक डॉ. रावसाहेब कसबे यांच्या हस्ते होणार असून या कार्यक्रमाचे अध्यक्षस्थान भाई वैद्य फौंडेशन आणि आरोग्य सेनेचे संस्थापक अध्यक्ष, समाजवादी विचारवंत डॉ. अभिजित वैद्य भूषविणार आहेत. हा कार्यक्रम येत्या गुरुवारी (ता. २२) सायंकाळी ५.३० वाजता, एस.एम.जोशी फौंडेशन सभागृह, नवी पेठ येथे होणार आहे. डॉ. एंगडे हे मुळचे महाराष्ट्रातील नांदेड येथील असून त्यांचा नांदेड येथील गरीब दलित कुटुंब ते हार्वर्ड, व्हाया मुंबई, ऑक्सफर्ड आणि जोहान्सबर्ग असा प्रवास थक्क करणारा आहे. ते एक संशोधक, मानवाधिकार कार्यकर्ते, आंबेडकरवादी सामाजिक कार्यकर्ते, कायदेतज्ज्ञ, लेखक, आघाडीचे विचारवंत आणि जातव्यवस्थेचे जगप्रसिद्ध अभ्यासक आहेत. सध्या ते अमेरिकेतील बॉस्टन येथील हार्वर्ड केनेडी स्कूलमध्ये सीनियर फेलो म्हणून संशोधन करीत असून ऑक्सफर्ड विद्यापीठातही ते काम करतात.
तर गेडाम या चंद्रपूर जिल्ह्यातील गोंडगुडा या आदिवासी गावातील जिल्हा परिषदेच्या प्राथमिक शाळेत शिक्षिका म्हणून काम करीत आहेत. त्यांनी पारंपरिक, रुढ तासिका आणि पाठ्यपुस्तके या व्यतिरिक्त शिकणे, शिकविणे तसेच परीक्षा आणि मूल्यमापन या संदर्भात विविध प्रयोग त्यांनी केले आहेत.