पुणे, ता. १७ ः लहान मुले घेऊन सुद्धा मतदानाला जाता येणार आहे. कारण मतदान केंद्रांच्या ठिकाणी पाळणाघराची व्यवस्था करण्यात येणार आहे. पाळणाघरांची जबाबदारी अंगणवाडी सेविका आणि मदतनीस यांच्यावर असेल. मतदान करण्यासाठी जेवढा वेळ लागेल, तेवढा वेळ पाळणाघरात अंगणवाडी सेविकेने दिलेल्या खेळण्यांसोबत बाळे खेळू शकणार आहेत. तर अंगणवाडी सेविकांनी मात्र विनामोबदला काम करावे लागत असल्याने नाराजी व्यक्त केली.
महिला मतदारांनी घराबाहेर पडून जास्तीतजास्त मतदान करावे, महिलांचा मतदानातील टक्का वाढण्यासाठी जिल्हा प्रशासनाने पाचहून मतदान केंद्र असलेल्या ठिकाणी पाळणाघर करण्याचे नियोजन केले. सुमारे दोन हजार १०० ठिकाणी पाळणाघर असतील. पाळणाघरात पिण्याचे पाणी, खेळण्यांबरोबरच बाळाला आवश्यकतेनुसार पोषक आहारदेखील उपलब्ध असणार आहे. त्यामुळे बाळाला घेऊन मतदानाला आल्यानंतर अंगणवाडी ताईंकडे बाळ सोपवून महिला मतदार निश्चितपणे मतदान करू शकतात, असे प्रशासनाकडून सांगण्यात आले.
लोकसभा निवडणुकीत पुणे शहरातील काही मतदान केंद्रावर पाळणाघरातील अंगणवाडी सेविकांना जेवणदेखील मिळाले नसल्याच्या तक्रारी करण्यात आल्या होत्या. याबाबत एक अंगणवाडी सेविका म्हणाली, ‘‘आम्हाला मतदानाच्या या कर्तव्यात काम करण्यास मिळते, याचा आनंद आहेच. परंतु, प्रशासन केवळ आम्हाला आदेशच देणार का, लोकसभा निवडणुकीच्या मतदानाच्या दिवशी मतदान केंद्रांवरील इतर कर्मचाऱ्यांना जेवण पोहचले, पण आम्हाला साधे पाणीदेखील विचारले नव्हते. मोबदला तर दूरच, पण किमान आम्हाला तुमचे काम कसे चालले आहे, हे पाहणीला आलेल्या वरिष्ठांनी विचारावे.

एकूण केंद्रे...
मतदान केंद्र - ८ हजार ४६२
मतदान केंद्रांची ठिकाणे - ३ हजार २३३
पाळणाघर असलेली मतदान केंद्रांची ठिकाणे - २ हजार १००

पाळणाघरात काय असणार?
- मुलांना बसण्यासाठी बाहुली घरे
- खेळणी
- शैक्षणिक साहित्य

पाळणाघर संख्या...
शहरात - ७००
ग्रामीण - १,३००
नगरपालिका - १००

विधानसभा निवडणुकीच्या मतदानाच्या दिवशी अंगणवाडी कर्मचाऱ्यांना पाळणाघराचे काम देण्यात आले आहे. ज्याप्रमाणे मतदान केंद्रात अन्य शासकीय कर्मचाऱ्यांना अतिरिक्त निवडणूक भत्ता दिला जातो, त्या प्रमाणात अंगणवाडी कर्मचाऱ्यांना पण देण्यात यावा. लोकसभा निवडणुकीमध्ये अंगणवाडी कर्मचाऱ्यांनी काम केले. पण अद्यापही निवडणूक भत्ता देण्यात आला नाही. त्यामुळे अंगणवाडी कर्मचाऱ्यांमध्ये मोठा असंतोष पसरला आहे.
नीलेश दातखिळे, राज्य उपाध्यक्ष, महाराष्ट्र राज्य अंगणवाडी कर्मचारी संघ

मतदान केंद्रांवरील पाळणाघरांचे नियोजन झाले आहे. पाचपेक्षा अधिक मतदान केंद्र असलेल्या ठिकाणी पाळणाघर करण्यात येणार आहेत. अंगणवाडी सेविकांना त्याबाबत सूचनाही केल्या आहेत. सेविका सकाळी मतदान सुरू झाल्यापासून ते मतदान प्रक्रिया पूर्ण होईपर्यंत पाळणाघरात उपलब्ध असतील. त्यांच्या जेवणाची व्यवस्था करण्याबाबत त्या-त्या निवडणूक निर्णय अधिकाऱ्यांकडून केली जाणार आहे. मोबदला देण्याबाबत आयोगाकडून सूचना करण्यात आल्या नाहीत.
मोनिका रंधवे, नोडल अधिकारी, पाळणाघर तथा बालविकास प्रकल्प अधिकारी, पुणे