पुणे, ता. १७ ः ओबीसीच्या शैक्षणिक, सामाजिक, राजकीय, आर्थिक उन्नतीसाठी महायुती सरकारने विविध निर्णय घेतले असून त्यांचे जीवनमान उंचावण्यासाठी आम्ही कटिबद्ध असल्याचे कसबा विधानसभा मतदारसंघातील भाजप महायुतीचे उमेदवार हेमंत रासने यांनी सांगितले.
रासने म्हणाले, ‘‘महायुती सरकारने ओबीसी आयोगाला संविधानिक दर्जा दिला. स्वतंत्र ओबीसी मंत्रालयाची स्थापना केली. गेल्या अंदाजपत्रकात चार हजार कोटी रुपयांच्या निधीची तरतूद केली. वैद्यकीय सेवेत राष्ट्रीय कोट्यात २७ टक्के आरक्षण दिले. शिक्षण, रोजगार, छात्रावास, स्पर्धा परीक्षा प्रशिक्षण, परदेशी शिक्षणासाठी शिष्यवृत्ती असे निर्णय घेतले. विविध समाजासाठी आर्थिक विकास महामंडळांची स्थापना केली. ‘महाज्योती’च्या माध्यमातून विविध योजना राबविल्या. देवेंद्र फडणवीस मुख्यमंत्री असताना ओबीसींसाठी २६ आदेश काढले. फुले दाम्पत्याने भिडे वाड्यातील सुरू केलेल्या मुलींच्या पहिल्या शाळेचे राष्ट्रीय स्मारक म्हणून निर्मितीचे काम पूर्ण करणार आहोत.’’
माहेश्वरी समाज, अखिल भारतीय ओबीसी सेवा संघ, श्री. खंडेलवाल (वैश्य) समाज, स्वराज्य सेना, कुंभार समाजोन्नती मंडळ, अल्पसंख्याक कल्याण आघाडी, श्री गुरव प्रतिष्ठान, कालिकादेवी संस्थान, असोसिएशन ऑफ अमॅच्युअर बॉक्सिंग, रिक्षा संघटना येहुवा सबकेनु ख्रिस्ती संघ यांच्यासह कसबा मतदारसंघातील गणेश मंडळांनी हेमंत रासने यांना पाठिंबा जाहीर केला आहे.