पुणे, ता. २९ ः गदिमा प्रतिष्‍ठानतर्फे देण्‍यात येणारा साहित्‍य, चित्रपट व कला क्षेत्रातील प्रतिष्‍ठेचा ‘गदिमा पुरस्‍कार’ यंदा विख्‍यात अभिनेत्री आशा काळे यांना जाहीर झाला आहे.
दिवंगत अभिनेते लक्ष्‍मीकांत बेर्डे यांच्‍या पत्‍नी प्रिया यांना ‘गृहिणी सखी सचिव’, क्षितिज पटवर्धन यांना ‘चैत्रबन’, तर मनीषा निश्‍चल यांना ‘विद्या प्रज्ञा’ हे पुरस्‍कार देण्यात येतील. १४ डिसेंबर रोजी टिळक रस्‍त्‍यावरील टिळक स्‍मारक मंदिर येथे पुरस्‍कार वितरण होईल. ज्‍येष्‍ठ नाटककार श्रीनिवास भणगे प्रमुख पाहुणे असतील, अशी माहिती संस्‍थेचे कार्यकारी विश्‍वस्‍त आनंद माडगूळकर यांनी पत्रकार परिषदेत दिली. या वेळी प्रतिष्‍ठानचे विश्‍वस्‍त प्रा. प्रकाश भोंडे आणि शिवराम कोल्‍हटकर उपस्थित होते.
चित्रपटकथा व गीते, कथासंग्रह, कादंबऱ्या, नृत्‍यनाटिका व गीतरामायण असा नजराणा महाराष्‍ट्राला देणाऱ्या गजानन दिगंबर माडगूळकर अर्थात गदिमा यांचा येत्या १४ डिसेंबरला ४७ वा स्‍मृतिदिन आहे. त्‍यानिमित्त गदिमा प्रतिष्‍ठानतर्फे विविध पुरस्‍कार देण्‍यात येतात.
आशा काळे यांनी चित्रपट व नाटक अशा दोन्‍ही माध्‍यमांतून अभिनयाची प्रदीर्घ कारकीर्द घडविली. अभिनेत्री तसेच कर्तृत्ववान गृहिणी म्‍हणून प्रिया बेर्डे यांची ओळख आहे. क्षितिज पटवर्धन यांनी कथाकार, पटकथाकार, संवाद लेखक तसेच गीतकार म्हणून उल्लेखनीय कामगिरी केली आहे. मनीषा निश्‍चल या नव्‍या उभारीच्‍या गायिका म्‍हणून परिचित आहेत. या वेळी शिक्षणतज्‍ज्ञ व ज्‍येष्‍ठ लेखक न. म. जोशी यांचा प्रतिष्‍ठानच्‍या वतीने विशेष सत्‍कार करण्‍यात येईल.
............