पुणे, ता. ७ : पुण्यापासून १९०० किलोमीटर अंतरावर असलेल्‍या नेपाळमधील गधीमाईदेवीच्‍या मंदिरात होणारी प्राणी हत्या थांबविण्‍यासाठी पुण्यातील शाकाहार प्रेरक डॉ. कल्याण गंगवाल यांनी पुढाकार घेत थेट नेपाळ गाठले. नेपाळला जाऊन तेथील लोकांशी, तसेच सरकारशी बोलणी करून या उत्सवात होणारी प्राणी हत्या थांबविण्यासाठी ते प्रयत्‍न करत आहेत.
वयाच्या ८० व्‍या वर्षी कार्यरत असलेले डॉ. गंगवाल हे गेल्या अनेक वर्षांपासून देशाच्या कानाकोपऱ्यात जाऊन पशुबळी थांबविण्यासाठी काम करत आहेत. त्यांनी गेल्या अनेक वर्षांपासून समाजात पशुबळीविरोधी चळवळीसाठी व्यापक काम केले आहे. गधीमाईदेवी मंदिराच्या आवारात दर पाच वर्षांनी जगातील सर्वात मोठे प्राण्यांचे बलिदान दिले जाते. त्या ठिकाणी प्राण्यांची निर्घृणपणे हत्या केली जाते. नेपाळ, तसेच भारतातील विविध राज्यांतील, तसेच महाराष्ट्रातूनदेखील अनेक लोक त्या ठिकाणी जात असतात.
गधीमाईदेवीला बळी दिला की मनातील मनोकामना पूर्ण होतात. तसेच, नवसाला पावणारी ही देवी, अशी लोकांची भावना असल्याने मोठ्या प्रमाणात प्राण्यांचे बळी दिले जातात. महिनाभर चालणाऱ्या उत्सवात हजारो प्राण्यांच्या कत्तली केल्या जातात. २०१९ मध्ये सुमारे लाखो म्हशी, बकऱ्या, कबुतरे व इतर प्राण्यांची कत्तल केली होती.
दरम्‍यान, अंदाजे ७० टक्के प्राणी हे भारतातून तिकडे आयात केले जातात. वाहतुकीदरम्यान त्या प्राण्यांना पुरेसे अन्न, पाणी, निवारा मिळत नाही. त्यांची अवैधरीत्या तस्करी केली जाते. त्या प्राण्यांना जिवंतपणीच मरणयातना दिल्या जातात. गधीमाई येथील निष्पाप प्राण्यांची बळी देण्याची प्रथा ताबडतोब बंद करावी, अशी मागणी डॉ. गंगवाल यांनी पत्रकाद्वारे केली.