पुणे, ता. ११ : विधानसभा निवडणुकीचे निकाल महाविकास आघाडीसाठीच नाही, तर राज्यातील जनतेसाठी धक्कादायक आहेत. कोणतीही लाट नसताना पाच महिन्यांपूर्वी झालेल्या लोकसभा निवडणुकीतील निकालाच्या एकदम उलट निकाल कसा काय लागू शकतो? असा प्रश्न निर्माण झाला आहे. त्यामुळे यापुढे निवडणुका या बॅलेट पेपर घ्याव्यात, या मागणीसाठी शहर काँग्रेसच्या वतीने बुधवारी स्वाक्षरी मोहीम राबविण्यात आली.

प्रदेश क्राँग्रेसच्या सूचनेवरून पक्षाच्या वतीने राज्यभरात सर्वत्र ‘निवडणुका बॅलेट पेपरवर घ्याव्‍यात’ यासाठी स्वाक्षरी मोहीम राबविण्यात येणार आहे. आज पुण्यात शहराध्यक्ष अरविंद शिंदे यांच्या नेतृत्वाखाली नवी पेठेत स्वाक्षरी मोहीम राबविण्यात आली.

शिंदे म्हणाले, ‘‘या निवडणुकीत मतांच्या टक्केवारीतील तफावत चिंताजनक आहे. निवडणूक आयोगाने जाहीर केलेल्या आकडेवारीनुसार मतदानाच्या दिवशी संध्याकाळी ५ वाजता ५८.२२ टक्के मतदान झाले, त्याच रात्री ११.३० वाजता ते ६५.०२ टक्के, तर दुसऱ्या दिवशी २१ नोव्‍हेंबर रोजी हेच मतदान ६६.०५ टक्के झाल्याचे सांगितले. यामध्ये एकूण ७.८ टक्के वाढ झाली आहे. म्हणजे ७६ लाख मतांची ही वाढ असून, मतदानाचा टक्का कसा वाढला, असा प्रश्न उपस्थित होत आहे. यामुळे ईव्‍हीएम संदर्भातही अनेक प्रश्न उपस्थित होत आहेत.’’

यावेळी माजी आमदार बाळासाहेब शिवरकर, दीप्ती चवधरी, प्रदेश सरचिटणीस ॲड. अभय छाजेड, सचिव रफिक शेख, अजित दरेकर, लता राजगुरू, प्रदेश प्रवक्ते गोपाळ तिवारी, हनुमंत पवार, सुनील शिंदे, राज अंबिके, सुनील घाडगे यांच्यासह कार्यकर्ते व पदाधिकारी सहभागी झाले होते.
-----------