पुणे, ता. १३ : पेरणे फाटा येथे एक जानेवारीला आयोजित विजयस्तंभ अभिवादन सोहळ्याकरीता येणाऱ्या अनुयायांना आवश्यक त्या सोयी - सुविधा पुरवण्यासाठी संबंधित विभागांनी नियोजन करावे, अशा सूचना जिल्हाधिकारी डॉ. सुहास दिवसे यांनी केल्या.

विजयस्तंभ अभिवादन सोहळ्याच्या अनुषंगाने जिल्हाधिकारी यांनी आढावा बैठक घेतली, त्यामध्ये या सूचना त्यांनी दिल्या. यावेळी पोलिस सहआयुक्त रंजन कुमार शर्मा, डॉ. बाबासाहेब आंबेडकर संशोधन व प्रशिक्षण संस्था तथा ‘बार्टी’चे महासंचालक सुनील वारे, निवासी उपजिल्हाधिकारी ज्योती कदम यांच्यासह संबंधित विभागांचे अधिकारी उपस्थित होते.

डॉ. दिवसे म्हणाले, ‘‘विजयस्तंभ अभिवादन सोहळ्याकरीता ३१ डिसेंबर व १ जानेवारी या कालावधीत येणाऱ्या अनुयायांकरीता अधिक मेट्रो सेवा उपलब्ध करून देण्यात यावी. गतवर्षीपेक्षा या वर्षी बसेसची संख्या वाढविण्यात आली आहे. अनुयायांकरीता रस्त्यालगत विश्रांती कक्ष स्थापन करावे. कार्यक्रमाच्या दिवशी वाहतूक कोंडी निर्माण होऊ नये, याकरिता नियोजन करावे. ठिकठिकाणी सुविधांबाबत माहिती फलक लावावे.’’

संपूर्ण परिसरात स्वच्छता ठेवण्याकरिता विशेष प्रयत्न करावे तसेच वीजपुरवठा अखंडितपणे सुरू ठेवण्यात यावा. परिसरात मदत केंद्र, नियंत्रण कक्षाची स्थापना करावी. कार्यक्रमाच्या ठिकाणी येणाऱ्या अनुयायांना आवश्यक त्या सर्व सोयी - सुविधा उपलब्ध करून देण्यात याव्यात, कार्यक्रमाच्या नियोजनासंदर्भात संबंधित विभागांनी समन्वय ठेवून कामे करावीत, अशा सूचना डॉ. दिवसे यांनी दिल्या.