पुणे, ता. २ ः कल्याणीनगर अपघात प्रकरणात कारचालक अल्पवयीन मुलाचा गुन्हा स्वतःच्या अंगावर घेण्यासाठी दबाव आणत चालकाच्या अपहरणाचा प्रयत्न केल्याप्रकरणात बांधकाम व्यावसायिक विशाल सुरेंद्रकुमार अग्रवाल आणि सुरेंद्रकुमार अग्रवाल यांना न्यायालयाने प्रत्येकी ५० हजार रुपयांच्या वैयक्तिक जातमुचलक्यावर जामीन मंजूर केला आहे. प्रथमवर्ग न्यायदंडाधिकारी एन. एस. बारी यांनी हा आदेश दिला.
चालक गंगाधर शिवराज हेरीक्रुब (वय ४२) यांनी याबाबत फिर्याद दिली आहे. अल्पवयीन मुलाचा गुन्हा स्वतःच्या अंगावर घेण्यासाठी चालकाच्या अपहरणाचा प्रयत्न करून त्याचा मोबाईल फोन काढून धमकावल्याप्रकरणी न्यायालयीन कोठडीत असलेल्या सुरेंद्रकुमार ब्रह्मदत्ता अग्रवाल (वय ७७) आणि विशाल सुरेंद्रकुमार अग्रवाल (वय ५०, दोघे रा. बंगला क्रमांक एक, ब्रह्मा सनसिटी, वडगाव शेरी) यांनी जामिनासाठी अर्ज केला होता. जामीन मिळाल्यामुळे सुरेंद्रकुमार अगरवाल कारागृहाबाहेर येण्याची शक्यता आहे. तर रक्ताचे नमुने बदलून पुरावे नष्ट केल्याप्रकरणी न्यायालयीन कोठडीत असल्याने शिवानी विशाल अग्रवाल यांचा मुक्काम येरवडा कारागृहातच असणार आहे. जामीन अर्जावर सरकार पक्षातर्फे सहायक सरकारी वकील योगेश कदम आणि बचाव पक्षातर्फे ॲड. प्रशांत पाटील यांनी बाजू मांडली.

या अटींवर जामीन
- आठवड्यातून दोन वेळा पोलिस ठाण्यात हजेरी लावावी
- जिल्ह्याची हद्द सोडून बाहेर जायचे नाही
- पासपोर्ट पोलिसांकडे जमा करायचा
- साक्षीदारांवर दबाव आणायचा नाही