पुणे, ता. २ ः शहरात झिका विषाणूंचा संसर्ग झालेला सातवा रुग्ण मंगळवारी डहाणूकर कॉलमीमध्ये आढळला. आतापर्यंत आढळलेल्या सर्व रुग्णांची प्रकृती स्थिर असून त्यापैकी कोणालाही उपचारासाठी रुग्णालयात दाखल करण्यात आलेले नाही.
डहाणूकर कॉलनी येथील ४५ वर्षीय महिलेला झिका विषाणूचा संसर्ग झाल्याचा अहवाल प्रयोगशाळेने दिला. या रुग्णाला झिकाची सौम्य लक्षणे आहेत. यापूर्वी एरंडवणे भागातील चार आणि मुंढवा परिसरातील दोन रुग्णांना झिकाचे निदान झाले आहेत. त्यानंतर आता शहराच्या डहाणूकर कॉलनीमध्ये सातवा रुग्ण आढळला. यात सात रुग्णांमध्ये पाच महिला असून दोन पुरुष आहेत. पाच महिलांमध्ये दोन गर्भवती असल्याची माहिती महापालिकेच्या आरोग्य विभागातर्फे देण्यात आली. या सर्व रुग्णांवर घरीच उपचार करण्यात आले. या सर्वांची प्रकृती स्थिर असल्याचेही त्यांनी स्पष्ट केले.
एडिस इजिप्ती या डासाच्या मादीपासून झिकाचे संसर्ग होतो. हा डास चावल्यानंतर झिकाचा विषाणू शरीरात प्रवेश करतो. त्या पार्श्वभूमिवर महापालिकेकडून रुग्ण आढळलेल्या घरांमध्ये आणि त्याच्या भोवतालच्या एक किलोमीटर भागात फवारणी करण्यात येत असल्याची विभागातर्फे सांगण्यात आले.

डासांच्या पैदाशीमुळे झिकाचा संसर्ग होतो. त्यामुळे शहरातील डासोत्पत्तीची स्थाने नष्ट करण्यावर भर दिला आहे. तसेच, डास चावणार नाही, तशा प्रकारे नागरिकांनी काळजी घेण्याचे आवाहन करण्यात आले. झिकाचे रुग्ण आढळल्यानंतर महापालिकेने प्रतिबंधात्मक उपाययोजना राबविण्याला प्राधान्य दिले आहे. झिकाची लक्षणे दिसल्यास महापालिकेच्या दवाखान्यात किंवा खासगी दवाखान्यातून उपचार घ्यावे. विशेषतः रुग्ण आढळलेल्या भागातील गर्भवतींनी विशेष काळजी घ्यावी. त्यांनी त्यांच्या सोनोग्राफी नियमित कराव्या.
- डॉ. कल्पना बळीवंत, प्रमुख, आरोग्य विभाग, पुणे महापालिका