पुणे, ता. ३ : मागील सहा महिन्यांपासून कोरेगाव पार्क, बंड गार्डन, ढोले पाटील रस्ता येथील रहिवासी वाहतूक कोंडीमुळे त्रस्त झाले आहेत. त्यामुळे येत्या १० जुलैपर्यंत वाहतूक सुरळीत करावी, असा इशारा ‘वेक अप’ पुणे चळवळीचे संयोजक व माजी आमदार मोहन जोशी यांनी वाहतूक पोलिसांना दिला आहे.
वाहतूक सुरळीत करण्याच्या दृष्टीने वाहतूक विभाग करत असलेले प्रयत्न आणि प्रयोग परिणामकारक ठरत नसल्यामुळे रहिवासी त्रस्त झाले आहेत. या संदर्भात चर्चा करण्यासाठी पोलिस खात्याचे वाहतूक विभागाचे उपायुक्त रोहिदास पवार यांच्यासमवेत स्थानिक रहिवाशांची बैठक जोशी यांनी आयोजित केली होती. तसेच केळकर रस्ता आणि भिडे पुलादरम्यान होत असलेल्या वाहतूक कोंडीचीही चर्चा झाली. गर्दीच्या वेळी वाहतूक पोलिस नेमावा आणि बॅरिकेड्सची व्यवस्था करावी, अशी सूचना जोशी यांनी केली. वरिष्ठ पोलिस निरीक्षक राजकुमार शेरे यांनी तत्काळ कारवाई करण्याचे आश्वासन दिले. बैठकीत धैर्यशील वंडेकर, समीर रूपानी व डॉ. विद्या दानवे, रोहन सुरवसे, सुरेश कांबळे सहभागी झाले होते.