पुणे, ता. ५ ः वडगाव बुद्रूक येथील सहा वर्षांपासून प्रलंबित असलेल्या श्री शिवाजीराजे सांस्कृतिक भवन व कलामंदिराचे काम मार्गी लागण्यास आता मदत होणार आहे. गुरुवारी (ता. ४) झालेल्या महापालिकेच्या इस्टिमेट कमिटीच्या बैठकीत सांस्कृतिक भवनाच्या कामासाठी साडेअकरा कोटी रुपयांच्या निधीला मंजुरी देण्यात आली.
नरवीर तानाजी मालुसरे रस्ता (सिंहगड रस्ता) परिसरात महापालिकेचे नाट्यगृह किंवा सांस्कृतिक भवन नव्हते. त्यामुळे या परिसरात सांस्कृतिक भवन करण्याची स्थानिक नागरिकांची मागणी होती. त्यानुसार, महापालिका प्रशासनाने वडगाव बुद्रूक येथील सर्वे क्रमांक-३५ ते ४० या जागेवर श्री शिवाजीराजे सांस्कृतिक भवन व कलामंदिर उभारण्याचे निश्‍चित केले होते. त्यास महापालिकेने मान्यता दिली होती. सांस्कृतिक भवनाच्या उभारणीसाठी ४५ कोटी रुपये खर्च येईल, असा अंदाज होता. या कामाच्या १ ते ४ टप्प्यामध्ये दुमजली तळघर पार्किंग स्लॅब, नाट्यगृहाच्या प्रेक्षक गॅलरीच्या बैठक व्यवस्थेचे बांधकाम, कलाकारांच्या ग्रीन रूम व अन्य हॉलचे बांधकाम झाले आहे. तसेच नाट्यगृहाच्या पत्र्याच्या छताचे काम देखील झाले आहे. मात्र, निधी कमतरतेमुळे २०१७ पासून सांस्कृतिक भवनाचे काम प्रलंबित होते. हे काम पूर्ण करण्याची मागणी स्थानिक राजकीय व्यक्ती, नागरिकांकडून केली जात होती. मात्र, महापालिका प्रशासनाकडून त्याकडे दुर्लक्ष केले जात होते. गुरुवारी झालेल्या इस्टिमेट कमिटीच्या बैठकीत संबंधित सांस्कृतिक भवनाचा प्रस्ताव मांडण्यात आला. त्यामध्ये तेथील उर्वरित कामासाठी ११ कोटी ६० लाख रुपयांच्या खर्चाला मंजुरी देण्यात आली. या पैशांमधून अपूर्ण बांधकाम, सभागृहाच्या छताचे काम, आर्ट गॅलरी, संग्रहालय, पाइपलाइन, जनरेटर इमारत, काँक्रीटचे रस्ते, सीमाभिंत, प्रवेशद्वार कमान या स्वरूपाची कामे केली जाणार असल्याची माहिती भवन विभागाचे प्रमुख युवराज देशमुख यांनी दिली.