पुणे, ता. ५ ः बावधन खुर्द परिसरातील नॅन्सी ब्रह्मा या सोसायटीचे बांधकाम करताना मंजूर नकाशा व त्यानंतरच्या नकाशात बांधकाम व्यावसायिक विशाल अग्रवाल याने परस्पर बदल केला. या प्रकरणाच्या तपासासाठी पोलिसांकडून अग्रवाल याच्या चार दिवसांची पोलिस कोठडीची मागणी करण्यात आली होती. मात्र, न्यायालयाने अग्रवाल याला न्यायालयीन कोठडी सुनावली.
बावधन येथील नॅन्सी ब्रह्मा सोसायटीतील ७२ सदनिकाधारकांच्या फसवणूकप्रकरणी अग्रवाल व त्याच्या साथीदारांविरुद्ध हिंजवडी पोलिस ठाण्यात गुन्हा दाखल झाला होता. दरम्यान, कल्याणीनगर अपघात प्रकरणात येरवडा कारागृहात असलेल्या अग्रवाल याला पोलिसांनी अटक केली असून, त्याची पोलिस कोठडीची मुदत संपली होती. या प्रकरणात सोसायटीचे बांधकाम करताना मंजूर नकाशा व वेळोवेळी बांधकाम नकाशात बदल केला होता, त्यासंबंधी तपास करायचा आहे, तसेच सदनिकाधारकांकडून घेतलेल्या पैशांचा वापर नेमका कोठे केला, याबाबत बॅंकेशी पत्रव्यवहार केला आहे. मात्र बॅंकेकडून अद्याप उत्तर आलेले नाही. त्यामुळे अग्रवालला चार दिवसांची पोलिस कोठडी द्यावी, अशी मागणी सहाय्यक सरकारी वकील विजयसिंह जाधव यांनी केली. प्रथमवर्ग न्यायदंडाधिकारी व्ही. पी. खंदारे यांनी अग्रवालला न्यायालयीन कोठडी सुनावली.

त्या आरोपींच्या जामिनावर
१२ जुलैला सुनावणी
कल्याणीनगर अपघात प्रकरणात रक्त नमुने तपासणीसह विविध गुन्ह्यांतर्गत कारागृहात असलेल्या डॉ. अजय तावरे, डॉ. श्रीहरी हळनोर, विशाल अग्रवाल, शिवानी अग्रवाल तसेच अमर गायकवाड या पाच आरोपींनी न्यायालयात जामिनासाठी अर्ज केला आहे. मात्र या प्रकरणाचे मुख्य तपास अधिकारी सुनील तांबे हे अधिवेशनासाठी गेल्याने पोलिसांकडून मुदतवाढ मागण्यात आली होती. त्यानुसार न्यायालयाने संबंधित आरोपींच्या जामीन अर्जावरील सुनावणी पुढे ढकलली असून, ही सुनावणी आता १२ जुलैला होणार आहे.