पुणे, ता. ५ ः पूर्ववैमनस्यातून टोळक्‍याने तरुणाचा पाठलाग करून त्याच्यावर कोयत्याने वार केल्याची धक्कादायक घटना धायरी परिसरात भागात घडली. याप्रकरणी दोघांना अटक करण्यात आली असून आठ जणांविरुद्ध गुन्हा दाखल करण्यात आला आहे.
संदीप नरसिंग चव्हाण (वय २५, रा. राया रेसिडेन्सी, पोकळे वस्ती, धायरी) असे गंभीर जखमी झालेल्या तरुणाचे नाव आहे. प्रशांत ऊर्फ सोन्या प्रकाश कोळी (वय १८, रा. वरदविनायक हाईट्‌स, धायरी) व गणेश चंदू जायगुडे (वय १८, रा. गणेश रेसिडेन्सी, पोकळे वस्ती, धायरी) यांना अटक करण्यात आली आहे. याप्रकरणी सिंहगड रोड पोलिस ठाण्यात सात ते आठ जणांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, चव्हाण आणि त्याचे मित्र बुधवारी रात्री धायरी परिसरात गप्पा मारत थांबले होते. त्यावेळी आरोपी जायगुडे, कोळी आणि त्यांचे साथीदार तेथे आले. त्यांनी त्यांच्याकडे मन्या कुठे आहे? अशी विचारणा करत त्यांना धमकाविण्यास सुरवात केली. या प्रकारामुळे चव्हाण व त्याचे मित्र घाबरून तेथून पळाले. मात्र चव्हाण हा शिव विहार सोसायटीच्या आवारात पाय घसरून पडला. त्यावेळी आरोपींनी त्याच्यावर कोयत्याने वार केले. या घटनेत चव्हाण हा गंभीर जखमी झाला.