पुणे, ता. ८ : ‘गोमाता चारा खा.. पाणी पी आणि सुखी रहा’ हा आगळावेगळा उपक्रम महा एनजीओ फेडरेशनने सुरु केला आहे. या उपक्रमांतर्गत महाराष्ट्रातील शंभर गोशाळांना चाऱ्याचे वाटप करण्यात आले. गोमातांना उन्हाच्या वाढत्या झळा देखील सोसाव्या लागल्या. अनेक ठिकाणी दुष्काळामुळे चारा-पाणी मिळत नव्हते. त्यामुळे हे अभियान राबविण्यात आले. यासाठी ठाण्याचे सी. एल. राठी आणि परिवाराने मोठे योगदान दिले. याशिवाय राज्यातील अनेकांची मदत लाभल्याची माहिती फेडरेशनचे संस्थापक अध्यक्ष शेखर मुंदडा यांनी दिली. या उपक्रमांतर्गत पुणे जिल्ह्यातील दौंड तालुक्यातील बोरीपार्धी येथील श्री बोरमलनाथ गोशाळा ट्रस्ट येथे ४५० हून अधिक खिलार, गीर आदी जातींच्या गोवंशांची सोय करण्यात आली. तेथे रोज सुमारे सहा टन चारा लागतो, ज्याचा खर्च सुमारे १० हजार रुपये आहे. लीला मणियार यांनी ५० हजार रुपये किमतीचा चारा उपलब्ध करून देत उपक्रमाला प्रारंभ झाला.
-----