पुणे, ता. ३ : नवरात्रोत्सवानिमित्त शहरातील काही प्रमुख मंदिरांच्या परिसरात भाविकांची गर्दी होते. या उत्सवादरम्यान काही अनुचित घटना घडू नये, यासाठी पोलिस बंदोबस्त तैनात करण्यात आला आहे.
श्री तांबडी जोगेश्वरी मंदिर, भवानी पेठेतील श्री भवानी माता मंदिर, श्री चतु:शृंगी मंदिर आणि सारसबागमधील श्री महालक्ष्मी मंदिरासह अन्य काही मंडळांच्या परिसरात दसऱ्यापर्यंत पोलिस बंदोबस्त तैनात राहील. उत्सवाच्या कालावधीत गर्दीचा फायदा घेत चोरट्यांकडून मोबाईल आणि महिलांचे दागिने चोरीला जाण्याच्या घटना घडतात. या पार्श्वभूमीवर प्रमुख मंदिरांच्या परिसरात भाविकांसाठी पोलिस मदत कक्ष सुरू केला आहे. महिला आणि पुरुषांसाठी स्वतंत्र दर्शनरांगांची व्यवस्था करावी. तसेच, मंदिर परिसरात सीसीटीव्ही बसविण्याच्या सूचना मंदिर प्रशासनाला देण्यात आल्या आहेत, अशी माहिती विशेष शाखेकडून देण्यात आली.