पुणे, ता. ४ : जागतिक प्राणी दिनाच्या पार्श्वभूमीवर जागरूकता निर्माण करण्यासाठी सेंट मीरा या प्राथमिक शाळेतील विद्यार्थ्यांनी ४ ऑक्टोबरला मेट्रोमधून रॅली काढली. त्यात सुमारे १०० विद्यार्थ्यांचा समावेश होता.
रूबी हॉल ते शिवाजीनगर न्यायालय मार्गावरील मेट्रोतून रॅली काढण्यात आली. ‘पक्षी आणि प्राणी हे आमचे भाऊ आणि बहिणी आहेत,’ ‘सेव्ह ॲनिमल्स, सेव्ह अर्थ,’ अशा घोषणा देण्यात आल्या.
साधू वासवानी यांच्या विचारांना या रॅलीत उजाळा देण्यात आला. या उपक्रमामधून समाजातील प्राणी हक्क आणि शाकाहाराची आवश्यकता, याबाबत प्रसार करण्यात आला. मुख्याध्यापिका रूबी कार्ना म्हणाल्या, ‘‘केवळ जागरूकता नव्हे तर, सजीवांप्रती दयाळूपणा आणि करुणेच्या मूल्यांची शिकवण मुलांमध्ये करण्यासाठी हा उपक्रम झाला.’’