पुणे, ता. ४ : ‘‘मराठीला अभिजात भाषेचा दर्जा मिळावा, यासाठी तत्कालीन मुख्यमंत्री पृथ्वीराज चव्हाण यांनी मराठी भाषा विभागाचे स्वतंत्र मंत्रालय निर्माण केले. तसेच अभिजात भाषेचा दर्जा मिळण्यासाठी त्यांनी पाठपुरावा करून योगदान दिले,’’ असे मत काँग्रेसचे प्रवक्ते गोपाळ तिवारी यांनी व्यक्त केले.
केंद्र सरकारने गुरुवारी मराठी भाषेला अभिजात भाषेचा दर्जा देण्याची घोषणा केली. या घोषणेचे महाराष्ट्रातून उत्स्फूर्तपणे स्वागत करण्यात आले. या पार्श्‍वभूमीवर, तिवारी म्हणाले, ‘‘मराठी भाषेला ‘अभिजात’ दर्जा मिळण्यासाठी तत्कालीन सरकारने प्रा. रंगनाथ पठारे यांच्या अध्यक्षतेखाली समिती नेमली होती. त्यांनी अहवाल तयार करून चर्चा घडवून आणली. हा अहवाल त्यांनी केंद्र सरकारकडे पाठविला होता. या प्रक्रियेत तत्कालीन मुख्यमंत्री पृथ्वीराज चव्हाण यांनी मराठी भाषा विकसित करण्यापासून ते मराठी भाषेला अभिजात दर्जा देण्याबाबतचा प्रस्ताव केंद्र सरकारकडे पाठविण्यापर्यंतची कामे केली होती. त्यामुळे मराठी भाषेला अभिजात भाषेचा दर्जा मिळाल्याचा आनंद साजरा करतानाच चव्हाण यांनी केलेल्या पाठपुराव्याकडे दुर्लक्ष करून चालणार नाही.’’