पुणे, ता. ८ : शासकीय औद्योगिक प्रशिक्षण संस्थेच्यावतीने (आयटीआय) इयत्ता नववी ते बारावीच्या विद्यार्थ्यांसाठी ‘छत्रपती शाहू महाराज युवा शक्ती करिअर शिबिरा’चे आयोजन सोमवारी (ता. १०) औंध येथील भारतरत्न पंडित भीमसेन जोशी सभागृहात करण्यात आले आहे. दुपारी साडेबारा ते सायंकाळी पाच या वेळेत हे शिबिर असणार आहे.

शिबिरात दहावी - बारावीनंतर करिअर कसे निवडावे, शिक्षणाच्या विविध संधी कशा उपलब्ध होऊ शकतील, या विषयावर मान्यवरांची मार्गदर्शनपर व्याख्याने होणार असून सचित्र प्रदर्शन, आयटीआय अभ्यासक्रम आणि पुढील शिक्षण, बारावीनंतरचे अभ्यासक्रम आणि प्रवेश प्रक्रिया, शैक्षणिक कर्ज आणि शिष्यवृत्ती, परदेशातील शिक्षण, महाराष्ट्र राज्य कौशल्य विद्यापीठ आणि स्वयंरोजगाराबाबत माहिती देणारे स्टॉल येथे असणार आहेत. प्रामुख्याने इयत्ता नववी ते बारावीची परीक्षा दिलेले विद्यार्थी, पालक - शिक्षक यांनी जास्तीत जास्त संख्येने शिबिरात सहभागी व्हावे, असे आवाहन शासकीय औद्योगिक प्रशिक्षण संस्थेचे उपसंचालक आर. बी. भावसार यांनी केले आहे.