पुणे, ता. ६ ः देश हा धर्माच्या नावावर नव्हे तर, संविधानावर चालत असतो. परंतु गेल्या दहा वर्षांपासून जातीयवादी शक्तींमुळे भारतीय संविधान धोक्यात आले आहे. त्यामुळे येत्या लोकसभा निवडणुकीत जातीयवादी शक्तींचा पराभव हेच मुख्य ध्येय ठेवण्याचा निर्धार समाजवादी पक्ष व समाजवादी विचारवंतांनी शनिवारी (ता. ६) पुण्यात आयोजित राज्यस्तरीय बैठकीत केला.

समाजवादी पक्षाच्या वतीने आज पुण्यात समाजवादी विचारवंत, नेते आणि कार्यकर्त्यांची राज्यस्तरीय बैठक आयोजित केली होती. या बैठकीत उपस्थित कार्यकर्त्यांना मार्गदर्शन करताना हा सल्ला देण्यात आला. या बैठकीला समाजवादी पक्षाचे महाराष्ट्र प्रदेश कार्याध्यक्ष प्रताप होगाडे, उपाध्यक्ष पी. डी. जोशी, शरद जावडेकर, ज्येष्ठ समाजवादी विचारवंत डॉ. कुमार सप्तर्षी, सुभाष वारे, सुभाष लोमटे, ॲड. रेवण भोसले, विठ्ठल सातव आदींसह राज्यभरातील सुमारे १०० प्रतिनिधी उपस्थित होते.

राज्यातील समाजवादी विचारांच्या चळवळीतील सर्व घटक पक्ष, संस्था, संघटनांनी येत्या लोकसभा निवडणुकीत जातीयवादी शक्तींचा पराभव करण्यासाठी एकदिलाने काम केले पाहिजे. या जातीयवादी शक्तींमुळे देशाची धर्मनिरपेक्षता आणि एकूणच देशाचे संविधान धोक्यात आले आहे. त्यामुळे या शक्तींना रोखण्यासाठी लोकसभेत त्यांचा पराभव करण्यासाठी काम करणे, हा एकमेव मार्ग असल्याचे यावेळी सुभाष वारे यांनी सांगितले.

देशात गेल्या दहा वर्षांपासून मनुवादी विचारसरणीने पुन्हा डोके वर काढले आहे. ही शक्ती संविधानाला डावलून त्यांना हवे तसे बदल करू लागली आहे. त्यामुळे या शक्तीला रोखण्याची गरज असल्याचे मत डॉ. कुमार सप्तर्षी यांनी व्यक्त केले. प्रास्ताविक रेवण भोसले यांनी केले. प्रताप होगाडे यांनी आभार मानले.

प्रा. शरद पाटील यांना श्रद्धांजली
या बैठकीला सुरुवात करण्यापूर्वी जनता दल (धर्मनिरपेक्ष) या पक्षाचे दिवंगत प्रदेशाध्यक्ष व माजी आमदार प्रा. शरद पाटील यांना श्रद्धांजली वाहण्यात आली. आजच्या बैठकीला उपस्थित पदाधिकाऱ्यांमध्ये पूर्वी जनता दलात काम केलेल्या आणि सध्या समाजवादी पक्षात असलेल्या अनेक पदाधिकाऱ्यांचा समावेश होता. माजी पंतप्रधान एच. डी. देवेगौडा यांनी कर्नाटकात भाजपशी जवळीक साधल्याने, महाराष्ट्रातील अनेक पदाधिकाऱ्यांनी जनता दलातून बाहेर पडत, समाजवादी पार्टीत प्रवेश केला असल्याचे या वेळी सांगण्यात आले.